ننشر اعترافات المتهم الرئيسى بالسطو المسلح على شركة صرافة الدقى

تمكنت مباحث الجيزة من إغلاق قضية السطو المسلح على شركة صرافة بالدقى واستيلاء الجناة على مبلغ مليون و500 ألف جنيه بعد القبض على كل المتهمين البالغ عددهم 5 أشخاص، واستعادة جزء كبير من المبلغ المستولى عليه، وكانت المفاجأة التى كشفت عنها تحريات المباحث أن أحد المتهمين موظف سابق الشركة وأنه من خطط ودبر واستعان بباقى المتهمين لتنفيذ الجريمة.

وسرد المتهم "هشام.م" تفاصيل الجريمة منذ التخطيط لها وحتى القبض عليه قائلا: "أنا كنت شغال فى شركة صرافة المعادى من حوالى سنة، لكن حصلت مشكلة بينى وبين مدير الشركة بسبب اتهامى بالتلاعب فى أسعار العملات والحصول على الفارق لحسابى الخاص، وبعد طردى قررت إنى أنتقم من صاحب الشركة والمدير واللى شغالين فيها، وأحصل على حقى بطريقتى الخاصة".

وأضاف المتهم أمام اللواء خالد شلبى مدير الإدارة العامة لمباحث الجيزة: "أحد أصدقائى اسمه "السيد.ص" اتصلت عليه وطلبت مقابلته، وعرضت عليه فكرة سرقة شركة الصرافة، خاصة أن الشركة سهل اقتحامها لعدم تعيين أفراد أمن بها، وقلتله محتاجين ناس تانية تشارك معانا فى العملية، وبسرعة "السيد" اتصل على ناس أصحابه وهم "عبد القادر" و"مينا" و"بهاء" وطلب منهم يساعدونا فى تنفيذ الخطة ووافقوا بسرعة ومفيش حد فيهم أبدى أى اعتراض، وقبل الحادث بشهر كنا بننزل نراقب الشركة وتحركات الموظفين اللى شغالين فيها، وأكتر الأوقات اللى بتكون زحمة فيها، واتفقنا أن التنفيذ يكون يوم السبت، عشان الدنيا بتكون هادية.

وتابع المتهم الرئيسى اعترافاته قائلا: "جبنا تاكسى وفى صباح يوم السبت موعد تنفيذ العملية رحنا على الشركة، لكن أنا استنيت فى التاكسى عشان شكلى معروف للموظفين، وكان صادق معاه "طبنجة" ومينا معاه "فرد خرطوش" وعبد القادر معاه "سكينة"، ودخلوا الشركة وهددوا الموظفين اللى شغالين فيها واستولوا على كل المبالغ المالية اللى عثروا عليها، وكمان استولوا على جهاز اللاب توب اللى بيسجل مقاطع الفيديو الخاص بكاميرات المراقبة عشان محدش يكشفنا.

وقال المتهم: "أول ما خلصنا تنفيذ العملية توجهنا إلى منزل "بهاء" ببولاق الدكرور وقسمنا الفلوس بينا، وكل واحد حصل على حقه ورجع لبيته، لحد ما ضباط المباحث قبضوا عليا، واتهمونى بالسرقة، فاعترفت بكل حاجة وأرشدت عن باقى المتهمين اللى تم القبض عليهم".

وكشفت تحريات العقيد عبد الحميد ابو موسى مفتش مباحث شمال الجيزة عن هوية المتهمين بعد التوصل إلى وجود خلافات سابقة بين مدير الشركة وأحد الموظفين المفصولين بسبب سوء سلوكه، وأن الموظف تمت مشاهدته أكثر من مرة بمحيط الشركة قبل الحادث بأيام.

ومن خلال تكثيف التحريات تم التأكد من تورطه فى ارتكاب الواقعة، وبإعداد كمين له تمكن الرائد مصطفى خليل رئيس مباحث قسم شرطة الدقى من ضبط المتهم، الذى اعترف بارتكاب الجريمة وأرشد عن باقى المتهمين.

وبإعداد عدة أكمنة تمكن النقباء محمد مختار ومصطفى عرفة ومحمد مجدى ويحيى السيد وعمرو البرعى من ضبط المتهمين، وتبين أن أحدهم وضع نصيبه من المبلغ المسروق بدفتر توفير باسم والدته، واشترى آخر سيارة ملاكى، واشترى متهم ثالث مصوغات ذهبية لزوجته، وتم تحرير محضر بالواقعة وأخطر اللواء أحمد حجازى مدير أمن الجيزة وبإحالتهم إلى النيابة أمرت بحبسهم على ذمة التحقيق.