بالفيديو..مصريون يحملون المستورد و" الصرافة مسئولية ارتفاع سعر الدولار

استطلعت كاميرا “فيديو 7″ قناة اليوم السابع المصورة ، آراء عدد من المواطنين، حول ارتفاع سعر الدولار أمام الجنيه المصرى، واجتياز العملة الأمريكية حاجز الـ9 جنيهات فى السوق السوداء.

“المستورين هما السبب فى أزمة الدولار مش الحكومة ” هكذا يرى طارق المصرى صاحب مصنع تطريز ، وتابع:”المستوردين بيلعبوا دور كبير قوى بالإضافة إلى أن هناك لعبة تتم فى الخارج .. فى ناس لها مصلحة بره بتقدر تلعب على الاقتصاد المصرى”

وتابع ” فى منتجات ملهاش أى قيمة فى حياتنا ، وكمان أنا مع غلق شركات الصرافة لأنها هتساعد فى تهدئة السوق “.

أما حسنى أحمد يعمل سائق فقال ” من زمان فى ناس معينة من الدولة ومعاهم بعض الرأس ماليين بتلعب بالدولار “.

“المستوردين هما السبب فى ارتفاع سعر الدولار” شريف عابدين يعمل موظف ، مضيفا:”فى حاجات مش مهمة بنستوردها زى أكل القطط وما شابه ذلك ، أما شركات الصرافة لازم يكون عليها رقابة شديدة جداً للقضاء على السوق السوداء “

“أزمة الدولار سوء تخطيط من كل الأطراف سواء الدولة أو المستثمرين ” لطفى مغازى يعمل مصور تليفزيونى يرى أن التخطيط هو السبب الرئيسى للأزمة حيث قال ” احنا معندناش سياحة ولا تصدير مصرى ولا حتى المصرين بيشتغلوا، إحنا محتاجين ناس تفكر صح ، وشركات الصرافة شكل من الأشكال المسببة لكن احنا لو صلحنا الاقتصاد هنلاقى الدولار على الأرض “.

” إحنا دولة مش مصدره ودى هى المشكلة واحتياجاتنا أكثر من إنتاجنا “هذا ما قاله عمرو شعلان صاحب محل فى منطقة وسط البلد” وتابع :” أحنا بنستورد أدوات تجميل وأكل قطط وكلاب بكميات كبيرة جداً وده كله مالوش لازمة .. ولازم الدولة تاخد موقف من هؤلاء المستوردين .. وشركات الصرافة ليها دور كبير فى ما يحدث لأنها سوق سودا ، المفروض يكون فى مندوب من الحكومة متواجد معهم طوال اليوم من فتح الشركة وحتى غلقها ليلاً ” .

ويقول مواطن :” المستوردين لهم يد لأنه بيشوف مصلحته أكثر من مصلحة البلد ، بيستورد منتجات ملهاش لازمة زى المنتجات الصينية كلها ملهاش لازمة ، وشركات الصرافة بتلعب بالسوق بشكل كبير لازم رقابة .. وهو مين يقدر يقفلها “.

إبراهيم فوزى يعمل فى مجال التسويق يقول “لازم نشغل المصانع المقفولة وبعدين نمنع الاستيراد لكن كده الناس هتشتغل فين “.

وقال مواطن رفض ذكر اسمه أن الدولة هى السبب فى ارتفاع سعر الدولار قائلا :” بتستورد بضائع ملهاش لازمة .. المفروض يضبط الميزانية الخاصة بالدولة وبعدين تعمل رفاهية براحتك “.

ويقول خميس يعمل بائع فى إحدى محال وسط البلد ” دى أزمة دولية .. والرقابة لازم تزيد من نسبة الجودة عشان تقلل الاستيراد “.