تعرف على تفاصيل صناعة "كوميكس" محبى الكرة العالمية على "فيس بوك"

انتشرت فى الآونة الأخيرة العديد من الصفحات التى تجمع ما بين محبى فرق كرة قدم العالمية وما بين روح السخرية التى يتميز به موقع التواصل الاجتماعى "فيس بوك"، فكان الناتج منها صفحات تصنع الصور والقصص الساخرة "كوميكس" على فرقها وفرق المنافسين، فى ظاهرة أبرزت إبداع العديد من المقيمين عليها، لاسيما فى مجال الجرافيك والتكنيك الجيد فى تنفيذها.

صفحات تحمل اسم "sarcasm society" أو "المجتمع الساخر" مسبوقة باسم الفريق المفضل، غزت "فيس بوك" منذ 5 سنوات بعد اندلاع ثورة 25 يناير وانبثاق أفكار الشباب منها عبر الموقع، ويوماً بعد يوم تلقى رواجاً وشهرة أكبر، ومن أشهرها " Manchester United Comics" و" RonAldo in pr" و" Arsenal Comics"وقِس على ذلك جميع الفرق المرموقة فى الدوريات الأوربية الكبرى.

"اليوم السابع" تواصل مع مدراء صفحتى " Manchester United Comics" و" RonAldo in pro"، وطرح عليهم العديد من الأسئلة الخاصة بعملهم واتجاهمهم فى صناعة الكوميكس، وكانت أهم الاسئلة: متى بدأت الصفحة نشاطها؟ وما هو الاتجاه الذى تقدمه ؟ كم عدد مدراء الصفحة وسنهم ومعلومات عن دراستهم ومجال عملهم الأساسى وكيفية التنسيق بينه وبين وقت الصفحة؟ ما رأيكم فى باقى الصفحات اللى تقدم نفس اتجاه الكوميس الذى تقدموه؟.

ومن جانبه قال أحد فريق عمل صفحة " RonAldo in pro" لـ"اليوم السابع"، "الصفحة اتعملت من أواخر 2012 لكن طبعًا ماكنتش نشطة اوى والشغل مكانش اللى هو كانت حاجات بسيطة اوى يعنى، الصفحة بدأت تاخد شكل ومكانة كويسة تقريبًا فـ 2014 كان فيه كزا ادمن ساعتها ومع الوقت المستوى بدأ يتطور وناس مشيت وناس انضمت، وحاليًا احنا 2 بس فـ الصفحة اللى قايمين بكل حاجة".

وتابع "الصفحة هى عبارة انها بتعبر عن حال الفريق ومشجعين الفريق بشكل ساخر شوية لكن مايمنعش ان يبقى فيه كلام جد كتير وتحليلات زى فقرة خلونا نتكلم كفنيين مثلاً، مش كل المحتوى يعنى بيبقى سخرية بالعكس فيه كوميكس كتير مثلاً بتبقى فـ سبيل الجد وحال الفريق بشكل حقيقى مش سخرية بس وبنتكلم باسم مشجيعن كتير للفريق مش بـ اسمنا بس وبناخد بالنا من كل حاجة بننزلها لأن دى بتمثل ناس كتير مش اللى شغالين فـ الصفحة بس، ولو تلاحظ الحمد لله مكانتنا عالية بين الصفحات ومعروفين بشغلنا العالى اللى صعب تلاقيه فـ حتة تانية اذا كان ايديت مثلاً أو افكار".

وأضاف "احنا 2 زى ما قولتلك واحد فى كلية تجارة والتانى فى كلية نظم ومعلومات، تنظيم الوقت مع الصفحة تقريبًا صعب وكمان عددنا 2 بس فهى مشكلة كبيرة الحقيقة لكن بعد كل ماتش بنحاول ننزل كزا حاجة ونستنى للماتش اللى بعده وبعدين ننزل وهكذا، فى الإجازة بنكون متواجدين معظم الوقت لكن فى الدراسة بيبقى صعب وبنحاول نتابع فى أوقات الماتشات بس".

وأوضح "باقى الصفحات اللى بتعمل الكلام ده هى كويسة طبعًا وبتقدم شغل كويس لكن تقريبًا كل الصفحات حاليًا بتقدم محتوى ساخر بشتيمة وانا مش فاهم ليه الحقيقة لما ممكن تقدم محتوى بيضحك وكويس ومن غير شتيمة، تقريبًا كل الصفحات حاليًا بتتبع الاسلوب ده فيما عدا احنا وكام صفحة يتعدوا ع الصوابع، دى اكبر سلبية شايفها فيهم هى الشتيمة وده بيخلى شكل المحتوى سئ لأى حد شاف البيدج لأول مرة مثلاً".

فيما قال سالم محمد أحد مدراء صفحة " Manchester United Comics"، "الصفحة ابتدت فى 15/4 /2013، بس قبلها كنت أنا ورامى أشرف بنشتغل نعمل كوميكس فى جروبس مانشستر بعدها جات فكرة اننا ننزلها فى البيج والناس كلها تشوف بدل ما الناس اللى فى جروب مانشستر بس".

وأضاف "احنا بنحاول نقدم كوميكس مش تقليدية مابنشتغلش على templates مهروسة بنحاول نعمل حاجه مختلفة ودا كان واضح جدا من البداية واحنا اول ناس عملنا لونج كوميك رياضى وكنا احسن ناس فى النقطه دى بشهاده صفحات كتير"

وأوضح "احنا عددنا 13 واحد بس مش كلنا شغالين فى نفس الوقت بيكون فى تبديل ما بينا، احنا فينا ناس فى ثانوى وناس فى مخلصه كلية فى رينج 17 - 25 سنة"

وتابع "تنظيم الوقت بيختلف من شخص للتانى يعنى ع حسب كل واحد يعنى بيبقى مثلا الناس اللى بتدرس بتفتح 3 - 4 ساعات فى اليوم وفى ناس مثلا زى لاجئ على الفيسبوك بحكم شغلى وفى ناس بتشتغل بعد ما تخلص شغلها فى حاجات كتير، اما بالنسبة لشغل كل واحد فينا فى انا شغال سوشيال ميديا ومعانا يوسف عثمان ممثل ( بطل فيلم بحب السيما ) ومعانا ناس فى كليات اعلام وهندسة".

"مفيش حد ماشى بنفس اتجاه الكوميك بتاعنا غير بيج واحدة وهى ارسنال كوميكس.. لاننا احنا الاتنين بنسعى اننا نقدم شكل كوميكس مختلفة عن اللى بينزل فى صفحات تانية ومتكررة.. بنبقى عايزين نبيين للناس قد ايه احنا مختلفين عن باقى الصفحات ودا بيبقى باين جدا فى شغلنا وشغلهم.. عكس صفحات كوميكس رياضية كتير بتسعى للتفاعل وخلاص".

موضوعات متعلقة:

بالصور.. ليوناردو ديكابريو وماد ماكس أبطال كوميكس حفل الأوسكار