ننفرد بنشر الحلقة الأولى من نص التحقيقات فى قضية أحداث الكرم بالمنيا.. شهود الإثبات لم يذكروا واقعة تعرية السيدة المسنة المتهمون ينكرون حرق منازل الأقباط .. والمتضررون: حاولوا إجبارنا على ترك القرية

- نيابة المنيا تستكمل التحقيقات مع باقى المتهمين

• شهود الإثبات وزوج المجنى عليها لم يذكروا فى اقوالهم واقعة تعرية السيدة سعاد

• المتهمين فى قضية الكرم يرفعون شعار: "الكلام ده محصلش"

• زوج سعاد المعتدى عليها: 11 شخصا اقتحموا منزلنا وأشعلوا النيران به وبـ3 منازل أخرى و3

آخرين يحملون الأسلحة أطلقوا النار علينا.. ويقر بوجود خلافات بين نجله أشرف وزوج السيدة المسلمة

• نظير زوج نجوى المتهمة فى عرضها: كان فيه كلام فى القرية عن علاقة أشرف بمراتى

• أحد شهود الإثبات الأقباط: لما سمعت بقيام المسلمين بحرق البيوت للمسيحيين أخذت أولادى وبعتهم عن جيرانى مصطفى المسلم

ينفرد "اليوم السابع" بنشر الحلقة الأولى من نص التحقيقات مع 11 من المتهمين والمصابين والمتضررين وشهود الإثبات فى قضية أحداث الكرم بمحافظة المنيا، والتى شهدت أحداث عنف وشغب أسفر عن حرق منازل ومحال تجارية بسبب مشاجرة وقعت بين مسلمين ومسيحيين بالقرية.

وإليكم نص أقوال الشهود ومن بينهم دانيال عطية زوج سعاد المعتدى عليها.

س. اسمك إيه؟

ج. دنيال عطية عبده شحاتة 78 سنه فلاح ومقيم قرية الكرم أبو قرقاص المنيا.

س. ما تفصيلات شكواك؟

ج.اللى حصل أنا كنت قاعد فى البيت لقيت ناس داخلة على البيت وسألونى على ابنى أشرف قلتلهم معرفش عنه حاجة، ولعوا نار فى فرش البيت والثلاجات وكل حاجة فى البيت والبيت ولع كله، وبعدين دخلوا بيت ضاحى ولعوا فيه وفى كل الفرش اللى جوه، وبعدين دخلوا على بيت وجيه قاصد ولعوا فيه، وولعوا فى بيت سامى كمال وده كل اللى حصل.

س.متى وليه حدث ذلك؟

ج. الكلام ده حصل يوم 20/5/2016 بعد صلاة العشاء بقرية الكرم أبو قرقاص.

س.ما سبب ومناسبة تواجدك بالزمان والمكان سالف الذكر؟

ج. أنا كنت قاعد فى البيت بتاعى وكنت جاى من الورشة بتاعتى.

س.ومن كان به آنذاك؟

ج.أنا كنت أنا ومراتى.

س. وما الذى حدث تحديدا آنذاك؟

ج .اللى حصل إن أنا كنت قاعد فى البيت لقيت محمود عبد الرحيم ومجاهد صلاح حسن ومجدى محمد محمد زناتى وأحمد توفيق سيد ورفعت محمود عبد الرحيم ورمضان محمود عبد الرحيم ومحمد محمود عبد الرحيم وأحمد محمود عبد الرحيم ونظير إسحاق أحمد عبد الحافظ وعبد المنعم إسحاق أحمد وصالح عبد الحافظ أحمد عبد الحافظ دخلوا على وضربونى على وشى وولعوا النخلة اللى فى وش البيت والبيت كله اتحرق ولع وكان فيه "سبعة عشر ألف جنيه" كانوا فى جيبى خدوها منى وبعدين دخلوا ولعوا فى البيت اللى جنبى بتاع ضاحى وبيت وجيه وكسروا بيت سامى كمال.

س. وما صلتك بكل من مجاهد صلاح حسن ومجدى محمد محمد زناتى وأحمد توفيق سيد ورفعت ومحمود عبد الرحيم ورمضان محمود عبد الرحيم ومحمد محمود عبد الرحيم وأحمد محمود عبد الرحيم ونظير إسحاق أحمد عبد الحافظ وعبد المنعم اسحاق عبد الحافظ وصالح عبد الحافظ أحمد؟

ج.هم بلدياتى وجيرانى ونظير إسحاق ده صاحب ابنى أشرف.

س.وهل كان بحوزة سالفى الذكر ثمة أسلحة أو أدوات؟

ج.أيوه إسحاق كان معه بندقية آلى وابنه عبد المنعم كان معه فرد خرطوش ورفعت كان معه طبنجة، وده اللى شفته بس والباقى كان معاه أسلحة بس مخدتش بالى.

س.وهل استخدم أى من سالفى الذكر السلاح الذى كان بحوزتهم؟

ج.أيوه ضروبوا به نار فى الهوا وكانوا بيضربوا نار على البيوت والبيوت اتحرقت من ضرب النار.

س.كم عدد الأعيرة النارية التى استخدمها سالفو الذكر؟

ج.هى كثيرة معرفش.

س.وفى أى اتجاه قام سالفو الذكر بإطلاق الأعيرة النارية؟

ج.كانوا بيضربوا عليا نار وعلى البيت عندى.

س.هل بك ثمة إصابات؟

ج.لا.

س.وهل توجد ثمة خلافات بينك وبين المتهمين سالفى الذكر؟

ج.أيوه فيه خلافات بين نظير وابنى أشرف دنيال.

س.وما طبيعة تلك الخلافات؟

ج.معرفش.

س.وهل ترقى الخلافات لقيام المتهمين بتلك الواقعة؟

ج.معرفش.

س.وما قصد المتهمين من ارتكاب تلك الواقعة؟

ج. هم كانوا عاوزين يموتوا أشرف وأخوه وعايزين يحرقوا البيت بتاعى.

س.وهل ثمة اتفاق فيما بين المتهمين على ارتكاب تلك الواقعة؟

ج.أيوه علشان هم كانوا بيضربوا نار علينا وحرقوا البيت بتاعى.

س.هل توجد ثمة تلفيات بمنزلك؟

ج.أيوه.

س.وهل من ثمة معين شاهد على تلك الواقعة؟

ج.أهل البلد كلها شافوا الواقعة.

س.هل لديك أقوال أخرى؟

ج.لا.

وأقفل المحضر عقب إثبات ما تقدم وقررت النيابة الآتى أولا يصرف الحاضر بعاليه من سراى النيابة مؤقتا، ثانيا: يستمر التحفظ على مكان محل الواقعة، ثالثا: ينتدب أحد السادة المختصين بالأدلة الجنائية بالانتقال إلى محل البلاغ لبيان عما إذا كان هناك ثمة آثار حريق من عدمه، وفى الحالة الأولى بيان سببه وبيان مكان بداية اشتعال الحريق، وبيان ما إذا كان هناك مواد مستخدمة للاشتعال من عدمه وما إذا كان هناك شبهة جنائية من عدمه، وبيان أيضا ما إذا كان هناك ثمة آثار لإطلاق أعيرة نارية من عدمه، وفى الحالة الأولى بيان ماهيتها وطبيعتها والسلاح المستخدم فى إطلاقها وعداد تقرير مفصل يعرض علينا فى حينه، رابعا: تخطر الشئون الاجتماعية لاتخاذ اللازم قانونا، خامسا يطلب كل من عطية عياد فرج وعياد عطية عياد ونجليه لتحقيق عاجل، سادسا: تأمر النيابة بضبط وإحضار كل من مجاهد صلاح حسن ومجدى محمد محمد زناتى وأحمد توفيق سيد ورفعت محمود عبد الرحيم ورمضان محمود عبد الرحيم ومحمد محمود عبد الرحيم وأحمد محمود عبد الرحيم ونظير إسحاق أحمد عبد الحافظ وعبد المنعم إسحاق أحمد عبد الحافظ وصالح عبد الحافظ وأحمد عبد الحافظ ويعرضوا علينا فور التمكن من ضبطهم.

أقوال عطية عياد فرج أحد المتضررين، وأحد الشهود فى القضية.

س. اسمك إيه؟

ج.اسمى عطية عياد فرج سليمان 57 سنة فلاح مقيم شرارة أبو قرقاص.

س.ما تفصيلات حدوث إصابتك؟

ج.اللى حصل أنا سمعت إن نسيبى دانيال عطية عنده مشاكل فأنا رحت أشوف إيه الحكاية وأول ما رحت لقيت زيطة وناس قايمة على البيت، ولقيت واحد مشى على وضربنى بدبشك بندقية آلى على دماغى، وواحد ضربنى بعصى على ظهرى ووقعت على الأرض وحسيت بدوخة ومحستش بحاجة بعد كده وده كل اللى حصل وشفت ناس بتحرق البيت بتاع دانيال.

س.متى وأين حدث ذلك؟

ج.الكلام ده حصل يوم الجمعة 20/5/2016 ما بين المغرب والعشاء بناحية الكرم مركز أبو قرقاص.

س.ما سبب ومناسبة تواجدك بالمكان والزمان سالف الذكر؟

ج.أنا سمعت إن فيه مشاكل مع نسيبى دانيال عطية فرحت علشان أشوف إيه الحكاية.

س.من كان برفقتك آنذاك؟

ج.كان معايا ابنى عياد عطية عياد.

س.وما الذى حدث تحديدا آنذاك؟

ج. اللى حصل أنا سمعت إن فيه مشكله عند نسيبى دانيال فرحت علشان أشوف فيه إيه، ونحل الموضوع وأول ما رحت عند البيت عنده لقيت نظير ضربنى بدبشك البندقية الآلى على دماغى، وأبوه ضربنى على ظهرى وقعت على الأرض وخدوا منى المحفظة والبطاقة والفلوس اللى كانوا فى جيبى وبعدين لما شفتهم وكان معاهم ناس كتير كانوا بيولعو فالبيت بتاع دانيال عطية وده كل اللى حصل.

س.وهل كان بحوزة أى من سالفى الذكر ثمة أسلحة أو أدوات؟

ج.أيوه.

س.ومن تحديدا كان بحوزته ثمة أسلحة أو أدوات؟

ج.نظير كان معاه بندقية آلى وأبوه إسحق أحمد كان معاه عصى.

س.وهل استخدم سالفو الذكر تلك الأسلحة التى كانت بحوزتهم؟

ج. أيوه نظير إسحق ضربنى بالبندقية الآلى بالدبشك بتعها على رأسى وأبوه إسحق أحمد ضربنى بعصى على ظهرى، بس كان فيه ناس بعيد عنى معاهم أسلحة وبيضربوا نار فى الهواء على البيت بتاع دانيال.

س.فما هى كيفية حدوث إصابتك تحديدا؟

ج.هو نظير أول ما شفنى داخل البيت بتاع دانيال راح ضربنى بدبشك البندقية على دماغى.

ملحوظة:

تبين لنا وجود ضماضات طبية على رأسه لم نشأ فضها حفاظا على الماثل، وقرر لنا الماثل أنها نتيجة إصابتى نتيجة التعدى عليه من قبل كل من نظير إسحق وأبوه إسحق أحمد.

س وما قصد المتهمين من التعدى عليك؟

ج.هم قصدهم يضربونى.

س.وهل شاهدت واقعة حريق منزل المدعو دانيال عطية ووجيه قاصد وإسحاق وفضل سعد شرقاوى؟
ج.أنا شفتهم وهما بيحرقوا منزل دانيال عطية.

س.ومن تحديدا قام بارتكاب تلك الواقعة؟

ج.أنا اللى أعرفه واحد اسمه نظير إسحق وأبوه إسحق أحمد والباقيين معرفهمش.

س.هل توجد ثمة خلافات سابقة فيما بينك وبين المتهمين سالفى الذكر؟

ج.لا.

س.هل لديك أقوال أخرى؟

ج.لا.

عياد عطية أحد المتضررين والمصابين والشهود فى القضية.

س. اسمك إيه؟

ج .اسمى عياد عطية عياد فرج 30 سنة عامل مقيم شرارة مركز أبو قرقاص ولا أحمل تحقيق شخصية.

س.ما تفصيلات حدوث إصابتك؟

ج.اللى حصل أنا كنت رايح مع أبويا عند جدى دانيال فى الكرم، وأول ما رحت طلعت علينا ناس كتير ولقيت واحد ضربنى وعورنى فى ذراعى الشمال والباقيين حوالى ستة أشخاص ضربونى بالعصى على جسمى، ووقعت على الأرض وسابونى ومشيو وده كل اللى حصل.

س.متى وأين حدث ذلك؟

ج.الكلام ده حصل يوم الجمعة 20/5/2016 ما بين المغرب والعشاء بناحية الكرم مركز أبو قرقاص.

س.ما سبب ومناسبة تواجدك بالمكان والزمان سالفى الذكر؟

ج.أنا كنت رايح مع أبويا علشان عرفنا أن فى مشكلة مع جدى دانيال.

س.ومن كان برفقتك آنذاك؟

ج.كان معايا أبويا عطية عياد.

س.وما الذى حدث تحديدا آنذاك؟

ج.اللى حصل أول ما وصلنا عند بيت جدى لقيت زيطة وناس كتير فى الشارع وأول ما شفونى مشيوا عليا ودورو فيه الضرب ووقعت على الأرض، وبعد ما وقعت على الأرض سابونى ومشيوا.

س.ومن تحديدا قام بالتعدى عليك بالضرب وأحدث إصابتك؟

ج.أنا معرفش حد فيهم وأبويا هو اللى يعرفهم.

س.وهل كان بحوزة سالفى الذكر ثمة أسلحة أو أدوات؟

ج.أيوه أنا شفت واحد منهم كان معاه بندقية آلى وواحد كان معاه فرد خرطوش وناس كانت شايلة شوم عصى وخشب فيه مسامير.

س.وهل تقف على هوية تلك الأشخاص الذين كانوا يحملون تلك الأسلحة سالفة الذكر؟

ج.لا أنا معرفش لإنى أنا مبرحش البلد دى خالص، واللى يعرفهم أبويا.

س. وهل ثمة أعيرة نارية أطلقت فى تلك الواقعة؟

ج.أيوه فيه ناس كانوا بيضربوا نار معرفش أسمائهم.

س. وكم عدد الأعيرة النارية التى أطلقت آنذاك؟

ج.معرفش هما ضربوا نار كتير.

س.وما هى كيفية حدوث إصابتك؟

ج.اللى حصل أننا أول ما دخلنا عند البيت ناحية بيت دانيال جه اتنين مسكو أبويا وابتدوا يضربوا فيه، وبعد كده جت ناس ودفعونى على الأرض وقعدوا يضربوا فى لغاية ما أغمى على وسابونى ومشيوا.

س. وما قصد المتهمين من التعدى عليك آنذاك؟

ج.هم قصدهم يضربونى.

س.وهل شاهدت واقعة حريق منزل كل من دانيال عطية ووجيه قاصد وسامى صدام وفضل سعد شرقاوى.

ج. لا أنا مشفتش غير بيت دانيال عطية بس.

س. ومن تحديدا قام بارتكاب وقائع الحريق سالفة الذكر؟

ج.أنا معرفش حد فيهم.

س. هل ثمة خلافات بينك وبين المتهمين الذين قاموا بالتعدى عليك وإحداث إصابتك؟

ج.لا مفيش خلافات بيننا.

س .هل لديك أقوال أخرى؟

ج.لا.

أقوال: "سامى كمال صدام شحاتة"

س. اسمك إيه؟

ج.سامى كامل صدام شحاتة 64 سنه فلاح ومقيم الكرم مركز أبو قرقاص ولا أحمل تحقيق شخصية.

س.ما تفصيلات شكواك؟

ج. اللى حصل أنا كنت قاعد فى البيت ولقيت حريق ونار كتير طالعة من عند بيت دانيال فطلعت أشوف فى إيه وأول ما طلعت من البيت لقيت واحد اسمه مصطفى أحمد مصطفى وأولاده منعونا ودخلونا بيت وقفلوا علينا لغاية ما الموضوع ما خلص لقينا بيت وجيه مولع وكسرين بيتى ومكسرين فرش البيت بتاعى وبتاع ابنى ومبهدلين الأجهزة الكهربائية ومكسرينها وخدوا من البيت مبلغ سبعة آلاف جنيه والمحفظة والبطاقة وكل ده علشان عرفت أنه فى خلافات بين أشرف ابن دانيال وبين جماعة مسلمين وولعوا فى بيت وجيه علشان هو يبقى نسيب وجيه وواخد بنت وجيه وده كل اللى حصل.

س. متى وأين حدث ذلك؟

ج.الكلام ده حصل يوم الجمعة 20/5/2016 بعد المغرب على طول بناحية الكرم مركز أبو قرقاص.

س. ما سبب ومناسبة تواجدك بالمكان والزمان سالفى الذكر؟

ج.أنا كنت قاعد فى بيتى.

س. من كان برفقتك آنذاك؟

ج.كان معايا أهل بيتى.

س. ما الذى حدث تحديدا آنذاك؟

ج. اللى حصل أنا كنت قاعد فى البيت وسمعت صوت دوشة برة طلعت أشوف فيه إيه لقيت نار كتيرة طالعة من بيت دانيال، ولقيت واحد اسمه مصطفى وأولاده خدونى عندهم ودخلونا البيت وقفلوا علينا البيت وبعدها بشوية طلعت علشان أشوف فيه إيه اللى حصل، لقيت البيت بتاعى كله مكسر والفرش مكسر ومتبهدل والأجهزة الكهربائية مكسرة ولقيت سبعة آلاف جنيه مسروقة من البيت، وبعدين ولعوا فى بيت وجيه قاصد وبيت فضل سعد شرقاوى وده كل اللى حصل.

س. وما صلتك بكل من وجيه قاصد وإسحاق عزب وفضل سعد شرقاوى؟

ج.إحنا من بلد واحدة ومسيحيين زى بعض.

س .وهل تقف على الأشخاص الذين قاموا بالتعدى على منزلك وحريق منزل كل من وجيه وإسحاق عزب وفضل سعد؟

ج.أنا أعرف إن فى واحد اسمه نظير إسحاق أحمد وأبوه إسحق أحمد عبد الحافظ ومحمد محسن وفرغلى وتوفيق عبد الحافظ توفيق وعاطف سيد عبد الحافظ وسلامة عاطف سلامة ووائل عبد الله توفيق، وهما دول اللى حرقوا البيوت وسرقوا بيتى وبهدلوه.

س. وهل كان بحوزة سالفى الذكر ثمة أسلحة أو أدوات؟

ج.أيوه كان فيه ناس معاهم بسلاح كسروا البيت عندى.

س. ومن تحديدا كان بحوزته ثمة أسلحة أو أدوات؟

ج .اللى كان معاه سلاح حجاب أحمد عبد الحافظ كان معاه بندقية آلى وأحمد فؤاد توفيق كان معاه طبنجة وصابر فاروق توفيق كان معاه طبنجة وعبد المنعم حسن حين كان معاه فرد خرطوش.

س. وما دور سالفى الذكر تحديدا فى وقائع التعدى على منزلك؟

ج. دول بردو كانوا بيضربوا نار على البيوت وكانوا بيساعدوا الناس اللى بتحرق البيوت والكل دخل البيت عندى.

س. وهل استخدم سالفى الذكر تلك الأسلحة التى كانت بحوزتهم؟

ج. أيوه.

س. وفى أى اتجاه كانوا يصوبوا تلك الأعيرة النارية؟

ج. هما كانوا بيضربوا نار على البيوت وفى الهواء.

س. وكم عدد الأعيرة النارية التى أطلقها سالفو الذكر؟

ج. هم ضربوا كتير معرفش كام عيار بالظبط.

س. وهل توجد خلافات بينك وبين سالفى الذكر؟

ج. لا مفيش خلافات بس هما كان فيه خلافات بين دانيال ووجيه.

س. وما قصد المتهمين من ارتكابهم تلك الوقائع؟

ج. أيوه هم كانوا بيدوروا على أشرف دانيال وبيحرقوا بيوت المسيحيين فى كل البلد عندنا.

س. وهل فيه ثمة اتفاق فيما بين المتهمين على ارتكاب تلك الوقائع؟

ج. أيوه.

س. هل توجد ثمة تلفيات فى منزلك؟

ج. أيوه فيه تلفيات كتيرة.

س. وما هى طبيعة تلك التلفيات؟

ج.هى الأجهزة الكهربائية كلها مكسرة والفرش بتاع ابنى اتكسر.

س.وبكم تقدر قيمة تلك التليفات؟

ج.هى الأجهزة الكهربائية غالية والفرش غالى ومعرفش تقدر بكام.

س.هل من ثمة معين شاهد تلك الواقعة؟

ج.البلد كلها شافت الواقعة.

س.هل لديك أقوال أخرى؟

ج .لا.

أقوال نظير إسحق زوج السيدة نجوى المتهمة فى عرضها.

س.اسمك إيه؟

ج.اسمى نظير إسحق أحمد عبد الحافظ 35 سنة حاصل على دبلوم تجارة مقيم قرية الكرم مركز أبو قرقاص وأحمل بطاقة رقم 28103272400295.

س.ما قولك فيما هو منسوب إليك من أنك متهم بإحراز سلاح نارى بندقية آلية حال كونك لا يجوز الترخيص وحيازتها أو إحرازها على النحو المبين بالأحراز؟

ج.محصلش.

س.وما قولك فيما هو منسوب اليك انك متهم بوضع النار عمدا بمسكن كل من دانيال عطية عبده شحاتة وفضل سعد شرقاوى وإسحاق يعقوب وسامى كمال ووجيه قاصد إسحاق على النحو المبين بالأوراق؟
ج. الكلام ده محصلش.

س. ما قولك فيما هو منسوب إليك من أنك متهم بإتلاف المنقولات ومنازل مملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال ووجيه قاصد إسحاق على النحو المبين بالأوراق.

ج.محصلش.

س. وما قولك فيما هو منسوب إليك من أنك متهم بضرب وإحداث إصابة كل من عياد عطية عياد فرج وعطية عياد فرج وإسحاق سمير يعقوب المبينة بالتقارير الطبية وكان ذلك باستخدام أداة؟

ج. محصلش.

س. ما الذى حدث إذا وما هى ظروف طلبك وإحضارك؟

ج. اللى حصل أنا كنت قاعد فى البيت ولقيت ابن عمى محمد سمير محمد شغال فى مباحث المركز، وقالى أنت مطلوب هنا فى المباحث فتعالى وأنا رحت وسلمت نفسى.

س. متى وأين حدث ذلك؟

ج. الكلام ده حصل يوم السبت الموافق 21/5/2016 بالليل حوالى الساعة التاسعة مساء وأنا كنت قاعد فى البيت.

س. من كان يرافقك آنذاك؟

ج. أنا كان معايا أهل بيتى لما ابن عمى كلمنى.

س. ما قولك فيما قرره كل من دانيال عطية عبده وسامى كمال وعياد عطية فرج وعطية عياد فرج "تلونا عليه أقوالهم تفصيلا"؟

ج. الكلام ده محصلش.

س. وما تعليلك لما قرره سالفو الذكر؟

ج. أنا معرفش.

س. هل توجد ثمة خلافات فيما بينك وبين سالفى الذكر؟

ج. لا مفيش خلافات بينهم بس مفيش غير موضوع بتاع أشرف ابن دانيال وبين مراتى نجوى رجب فؤاد والكلام اللى طلع فى البلد إن كان فيه علاقة بينهم.

س. وما هو قولك فيما ذكره النقيب مالك سيد محمود بمحضره المؤرخ فى 20/5/20016؟

ج. الكلام ده محصلش.

س. وما قولك فيما سطره النقيب علاء الأمير بمحضر تحرياته المؤرخ فى 22/5/2016.

ج. الكلام ده معرفش عنه حاجة.

س. هل تم ضبطك فى قضايا مماثله من قبل؟

ج.لا.

س. هل لديك سوابق؟

ج. لا.

س. هل لديك اسم شهرة؟

ج.لا.

س. أنت متهم بإشعال النار عمدا فى المنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. كما أنك متهم بإحراز سلاح نارى بندقية آلية حال كونك لا يجوز الترخيص بحيازتها أو إحرازها على النحو المبين بالأوراق؟

ج. محصلش.

س. كما أنك متهم بإتلاف المنقولات والمنازل المملوكة لكل من دانيال عطية عبده شحاتة وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. كما أنك متهم بضرب وإحداث إصابة كل من عياد عطية عياد فرج وعطية عياد عطية فرج سليمان وإسحاق سمير يعقوب، كما هو مبين بالتقارير الطبية، وكان ذلك باستخدام أداة؟

ج. محصلش.

س. كما أنك متهم بإطلاق أعيرة نارية داخل قرية؟

ج.محصلش.

س. هل لديك أقوال أخرى؟

ج.لا.

أقوال رمضان محمود عبد الرحيم

س. اسمك إيه؟

ج. اسمى رمضان محمود عبد الرحيم عبد الحافظ 56 سنة فنى خراطة بالوحدة المحليه لمركز أبو قرقاص مقيم الكرم، وأحمل بطاقة رقم 26003022400174 مركز أبو قرقاص.

س.ما قولك فيما هو منسوب إليك من أنك متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. وما قولك فيما هو منسوب إليك من أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج. محصلش.

س. ما الذى حدث آنذاك وما هى ظروف ضبطك وإحضارك؟

ج. اللى حصل أنا كنت نايم فى البيت وجم خبطوا على فتحت وخدونى المركز، وده كل اللى حصل.

س. متى وأين حدث ذلك؟

ج. الكلام ده حصل يوم السبت الموافق 21/5/2016 فى بيتى بناحية الكرم مركز أبو قرقاص.

س. مين كان برفقتك آنذاك؟

ج. أهل بيتى.

س. ما قولك فيما قرره كل من دانيال عطية عبده وفضل سعد شرقاوى وسامى كمال صادق وعياد عطية عياد وعطية عياد فرج؟

ج. الكلام ده محصلش.

س. وما تعليلك لما قرره سالفو الذكر؟

ج.أنا معرفش.

س. هل توجد خلافات فيما بينك وبين سالفى الذكر؟

ج. لا مفيش خلافات بس فيه خلافات بين نظير ابن أختى وبين أشرف دانيال بسبب موضوع مرات نظير وأشرف.

س. ما قولك فيما سطره النقيب مالك سعد محمود بمحضره المؤرخ 20/5/2016؟

ج.الكلام ده محصلش.

س. ما قولك فيما سطره النقيب علاء الأمير بمحضر التحريات المؤرخ فى 22/5 /2016؟

ج. الكلام ده محصلش ومعرفش عنه حاجة.

س. هل تم ضبطك فى قضايا مماثلة من قبل؟

ج.لا.

س. هل لديك سوابق؟

ج.لا.

س . هل لديك اسم شهرة؟

ج.لا.

س. أنت متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. كما أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالتحقيقات؟

ج. محصلش.

س. هل لديك أقوال أخرى؟

ج.لا.

أقوال مجدى محمد

س. اسمك إيه؟

ج.مجدى محمد محمد زناتى 51 سنة مصرفى أول ببنك الإسكندراية بأبو قرقاص مقيم الكرم مركز أبو قرقاص، وأحمل بطاقة رقم 26505052400697.

س.ما قولك فيما هو منسوب إليك من أنك متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج. محصلش.

س. وما قولك فيما هو منسوب إليك من أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. ما الذى حدث آنذاك وما هى ظروف ضبطك وإحضارك؟

ج. اللى حصل وأنا قاعد فى البيت لقيت الضابط دخل عليا البيت وقالى تعالى معانا وخدنى على المركز أنا وابنى، وخدنا على المركز وبعدها جابونا على هنا.

س. متى وأين حدث ذلك؟

ج. الكلام ده حصل يوم السبت الموافق 21 /5/2016 قبل الفجر بناحية الكرم مركز أبو قرقاص.

س.من كان برفقتك آنذاك؟

ج. كان معايا أهل بيتى علشان أنا كنت قاعد فى البيت.

س. ما قولك فيما قرره كل من دانيال عطية عبده وسامى كمال صادق وعياد عطية عياد وعطية عياد فرج؟

ج. الكلام ده محصلش وأنا محرقتش بيوت حد أنا كنت بطفى معاهم الحريق.

س. هل توجد خلافات فيما بينك وبين سالفى الذكر؟ وما تعليلك لما قرره سالفو الذكر؟

ج. أنا معرفش.

س. هل توجد خلافات بينك وبين سالفى الذكر؟

ج.لا مفيش خلافات بس أنا من فترة عملت محضر لدانيال عطية بسبب شجرة كانت فى الشارع.

س. ما قولك فيما سطره النقيب مالك سعد محمود بمحضره المؤرخ 20/5/2016؟

ج. الكلام ده محصلش.

س. ما قولك فيما سطره النقيب علاء الامير بمحضر التحريات المؤرخ فى 22/5 /2016؟

ج. الكلام ده محصلش ومعرفش عنه حاجة.

س. هل تم ضبطك فى قضايا مماثلة من قبل؟

ج.لا.

س. هل لديك سوابق؟

ج.لا.

س . هل لديك اسم شهرة؟

ج. أيوه اسم شهرتى مجدى محمد محمد زناتى.

س. أنت متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد أسحاق على النحو المبين بالأوراق؟

ج.محصلش.

س. كما أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالتحقيقات؟

ج. محصلش.

س. هل لديك أقوال أخرى؟

ج.لا.

أقوال محمد مجدى محمد أحد المتهمين فى القضية

س. اسمك إيه؟

ج.محمد مجدى محمد محمد زناتى 29 سنة عامل عادى بأبو قرقاص مقيم الكرم مركز أبو قرقاص، وأحمل بطاقة رقم 28607202400857.

س.ما قولك فيما هو منسوب إليك من أنك متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج. محصلش.

س. وما قولك فيما هو منسوب إليك من أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. ما الذى حدث آنذاك وما هى ظروف ضبطك وإحضارك؟

ج. اللى حصل وأنا قاعد عند البيت لقيت الحكومة جت عندى فخدونى وركبونى البوكس وخدونى على المركز.

س. متى وأين حدث ذلك؟

ج.الكلام ده حصل يوم السبت الموافق 21 /5/2016 فى الفجر بناحية الكرم مركز أبو قرقاص.

س. ما سبب ومناسبة تواجدك بالمكان والزمان سالفى الذكر؟

ج. أنا كنت فى بيتنا.

س.من كان برفقتك آنذاك؟

ج. كان معايا أهل أخويا وأبويا.

س. هل تقف على معرفة الضابط القائم بضبطك؟

ج. هما أمناء شرطة معرفش أسماءهم.

س. ما قولك فيما قرره كل من دانيال عطية عبده وسامى كمال صادق وعياد عطيه عياد وعطية عياد فرج؟

ج. الكلام ده محصلش.

س . وما تعليلك لما قرره سالفو الذكر؟

ج. أنا معرفش.

س. هل توجد خلافات بينك وبين سالفى الذكر؟

ج.لا مفيش خلافات بس فيه خلافات بين دانيال وبين أبويا علشان أبويا من فترة كان عمله محضر بسبب شجرة كانت فى الشارع.

س. ما قولك فيما سطره النقيب مالك سعد محمود بمحضره المؤرخ 20/5/2016؟

ج. الكلام ده محصلش.

س. ما قولك فيما سطره النقيب علاء الأمير بمحضر التحريات المؤرخ فى 22/5 /2016.

ج. الكلام ده محصلش.

س. هل تم ضبطك فى قضايا مماثلة من قبل؟

ج.لا.

س. هل لديك سوابق؟

ج.لا.

س . هل لديك اسم شهرة؟

ج. لا.

س. أنت متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. كما أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالتحقيقات؟

ج. محصلش.

س. هل لديك أقوال أخرى؟

ج.لا.

أقوال وليد صابر

س. اسمك إيه؟

ج.وليد صابر فوزى عثمان 27 سنة طالب مقيم الكرم مركز أبو قرقاص، وأحمل بطاقة رقم 28904162400373.

س.ما قولك فيما هو منسوب إليك من أنك متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج. محصلش.

س. وما قولك فيما هو منسوب إليك من أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج. محصلش.

س. ما الذى حدث آنذاك وما هى ظروف ضبطك وإحضارك؟

ج. اللى حصل أنا كنت محمل فراخ من عند واحد اسمه رمضان جمعة فى الفكرية وبعدين سمعت إن فيه مشكلة فى البلد اتصلت بأبويا قالى تعالى من قبلى البلد علشان تبقى بعيد عن المشكلة وروحت البيت ونزلت الفراخ عند واحد اسمه شاكر أبو سعد فى البلد عندنا، وبعد ما روحت لقيت الحكومة جت عندى ولقيت الضابط وخدنى معاه على المركز وده كل اللى حصل.

س. متى وأين حدث ذلك؟

ج. الكلام ده حصل يوم الجمعة الموافق 20/5/2016 فى العاشرة مساء بناحية الكرم مركز أبو قرقاص.

س. من كان برفقتك آنذاك؟

ج. محدش كان معايا.

س. ما قولك فيما قرره كل من دانيال عطية عبده وسامى كمال صادق وعياد عطية عياد وعطية عياد فرج؟

ج. الكلام ده محصلش.

س . وما تعليلك لما قرره سالفو الذكر؟

ج. معرفش.

س. هل توجد خلافات بينك وبين سالفى الذكر؟

ج.لا.

س. ما قولك فيما سطره النقيب مالك سعد محمود بمحضره المؤرخ 20/5/2016؟

ج. الكلام ده محصلش.

س. ما قولك فيما سطره النقيب علاء الأمير بمحضر التحريات المؤرخ فى 22/5 /2016؟

ج. الكلام ده محصلش.

س. هل تم ضبطك فى قضايا مماثلة من قبل؟

ج.لا.

س. هل لديك سوابق؟

ج.لا.

س . هل لديك اسم شهرة؟

ج. لا.

س. أنت متهم بوضع النار عمدا بالمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالأوراق؟

ج.محصلش.

س. كما أنك متهم بإتلاف المنقولات والمنازل المملوكة لكل من دانيال عطية عبده وفضل سعد شرقاوى وإسحاق سمير يعقوب وسامى كمال صادق ووجيه قاصد إسحاق على النحو المبين بالتحقيقات؟
ج. محصلش.

س. هل لديك أقوال أخرى؟

ج.لا.

أقوال فضل سعد

س. اسمك إيه؟

ج.فضل سعد شرقاوى 65 سنة مساعد شرطة بالمعاش مقيم قرية الكرم مركز أبو قرقاص، وأحمل بطاقة رقم 25105092400213.

س. ما تفصيلات شكواك؟

ج. اللى حصل أنا كنت قاعد فى البيت أنا وأولادى ولقيت زيطة برة البيت ولقيت الباب بيخبط فطلعت فتحت الباب لقيت عبد الحافظ سيد ماسك بندقية آلى وقال خش جوه يا ابن الكلب وبعدين حاولنا نقفل الباب بالعافية مقدرناش ولقيت عبد الحافظ بيقول للناس اللى كانت معاه لف من وراء الباب وأنا لفيت من وراء الباب علشان أشوف هيعملوا إيه لقيت فضل راح ضرب طلقة على الباب وبعدين قفلت الباب من جوه وجرينا أنا وابنى غرب البيت علشان أشوف هيعملوا إيه لقيت عبد الحافظ بيضرب نار فى الهواء وبعدين رموا مولوتوف على الغرف اللى فى آخر البيت من غرب والحاجات اللى فى الغرف اتحرقت وولعت وده كل اللى حصل.

س.متى وأين حدث ذلك؟

ج.الكلام ده حصل يوم الجمعة الموافق 20/5/2016 حوالى الساعة الثامنة مساء بناحية الكرم أبو قرقاص.

س. من كان برفقتك آنذاك؟

ج.كان معايا ابنى وأهل بيتى.

س. ومن تحديدا قام بارتكاب تلك الوقائع؟

ج.أنا شفت عبد الحافظ سيد وفضل سيد ومجاهد صلاح حسن ورفعت محمود عبد الرحيم ورمضان محمود عبد الرحيم ومحمد محمود عبد الرحيم وأحمد محمود عبد الرحيم وهيثم أحمد فؤاد وخالد مسامح عوض وصابر صابر فوزى.

س. هل كان بحوزة سالفى الذكر ثمة أسلحة أو أدوات؟

ج. أيوه مجاهد كان معاه جركن بنزين ورفعت محمود كان معاه زجاجات مولوتوف وأحمد محمود عبد الرحيم كان معاه مولوتوف وهيثم أحمد كان معاه مولوتوف وعبد الحافظ كان بندقية وخالد مسامح كان معاه زجاجات مولوتوف وعبد الحافظ سيد كان معاه بندقية آلى وفضل سيد عبد الحافظ كان معاه بندقية خرطوش ومحمد محسن فرغلى عبد الحافظ كان معاه جركن بنزين.

س. وهل استخدم أى من سالفى الذكر تلك الأسلحة أو الأدوات؟

ج. أيوه عبد الحافظ كان يضرب بالبندقية وفضل سيد كان بيضرب بالبندقية اللى معاه والباقيين كانوا بيرمو نار على البيت.

س. وهل ثمة معين شاهد تلك الواقع؟

ج. البلد كلها شافت.

س. وهل توجد ثمة خلافات فيما بينك وبين المتهمين سالفى الذكر؟

ج. لا مفيش خلافات وهما جيرانى.

س. وما الذى دعى سالف الذكر إلى ارتكابهم تلك الوقائع؟

ج.هما عملوا كده علشان أنا مسيحى زى دانيال عطية عبده بسبب ابنه أشرف ومرات نظير إسحق.

س.وما هو قصد المتهمين سالفى الذكر من ارتكابهم تلك الواقعة؟

ج. هما قصدهم يحرقوا البيت علشان نمشى من البلد.

س. وهل من ثمة اتفاق سبق فيما بين المتهمين على ارتكاب تلك الوقائع؟

ج. أيوه.

س . وهل من ثمة تلفيات غير ذلك؟

ج. أيوه هما ولعوا فى آخر أوضتين فى البيت من غرب ناحية الزراعات.

س .هل لديك أقوال أخرى؟

ج.لا.

أقوال وجيه قاصد

س. اسمك إيه؟

ج.اسمى وجيه قاصد إسحاق عزب 64 سنة فلاح ومقيم الكرم مركز أبو قرقاص، وأحمل بطاقة رقم 25206072400331.

س. ما تفصيلات شكواك؟

ج. اللى حصل أنا كنت قاعد فى البيت أنا وأهل بيتى وبعدين سمعنا إن المسلمين بيحرقوا بيوت المسيحيين فخدت أولادى وبعتهم عند جيرانى مصطفى أحمد مصطفى وبعد كده طلعت بره عند مصطفى فوق السطح شفتهم وهم بيحرقوا البيت عندى وبيحرقوا فيه.

س.متى وأين حدث ذلك؟

ج.الكلام ده حصل يوم الجمعة 20/5/2016 حوالى الساعة السابعة أو الثامنة مساء بناحية الكرم أبو قرقاص.

س. من كان برفقتك آنذاك؟

ج.كان معايا ابنى وأهل بيتى.

س. ومن تحديدا قام بارتكاب تلك الوقائع؟

ج. عبد الحافظ سيد عبد الحافظ وفضل سيد عبد الحافظ وعاطف سيد عبد الحافظ ومحمد محسن فرغلى ومحسن فرغلى وهيثم أحمد فؤاد.

س. هل رأيت أيا من سالفى الذكر كان بحوزته ثمة أسلحة أو أدوات؟

ج. أيوه عبد الحافظ سيد كان معاه بندقية آلى وفضل سيد عبد الحافظ كان معاه بندقية خرطوش وعاطف كان معاه بنزين ومحمد محسن كان معاه سنجة ومحسن فرغلى كان معاه فرد خرطوش وهيثم كان بيحرق بالبنزين.

س. وهل استخدم أى من سالفى الذكر تلك الأسلحة أو الأدوات؟

ج. أيوه كان عبد الحافظ يضرب ببندقية آلى معاه فى الهواء وفضل سيد كان بيضرب بالبندقية اللى معاه فى الهواء والباقيين كانوا بيحرقوا فى البيت عندى.

س. وهل من ثمة معين شاهد تلك الواقع؟

ج. البلد كلها شافت.

س. وهل من ثمة خلافات فيما بينك وبين المتهمين سالفى الذكر؟

ج. لا مفيش خلافات بينى وبينهم لكن فيه خلافات بينهم وبين نسيبى أشرف دانيال.

س. وما الذى دعى سالفى الذكر إلى ارتكابهم تلك الوقائع؟

ج.هما عملوا كده علشان أشرف واخد بنتى ومسيحى زيهم.

س.وما هو قصد المتهمين سالفى الذكر من ارتكابهم تلك الواقعة؟

ج. هما قصدهم يحرقوا البيت بتاعى وأسيب البلد.

س. وهل من ثمة اتفاق سبق فيما بين المتهمين على ارتكاب تلك الوقائع؟

ج. أيوه.

س . وكيف وقفت على ذلك

؟
ج.علشان هم جم كلهم مع بعض.

س. وهل من ثمة تلفيات غير ذلك؟

ج. أيوه هما ولعوا فى البيت بتاعى وكسروا الفرش بتاع البيت.

س .هل لديك أقوال أخرى؟

ج.لا.

موضوعات متعلقة..

- تجديد حبس 3 متهمين فى أحداث الكرم 15 يوما