قال الرئيس عبد الفتاح السيسى، إن استدامة معدل النمو الاقتصادى تعنى عدم التأخر فى هذه الاستدامة، وأن أى تأخر سيسبب مشكلة، متابعا: "بقالنا 7 سنين ما كناش بنتحرك بالشكل المناسب، علاوة على إن كان عندنا تأخير فى السنين اللى فاتت".
ووجه الرئيس السيسى، فى كلمته خلال حفل تدشين المرحلة الأولى من العاصمة الإدارية الجديدة، اليوم الأربعاء، حديثه للمصريين قائلا: "عايز أقول لكل المصريين، هل اللى إحنا بنعمله ده كان على حساب حركة الحكومة فى كل الأولويات والمشروعات الأخرى؟ لأ طبعا، أنا هبقى سعيد بأى نقد مدرك وفاهم وعارف، هو حد عاوز يتكلم عن مصر وميزانيتها لـ100 مليون مواطن و100 ألف موضوع، والابن اللى قاعد فى البيت مش عارف أبوه بيجيب الفلوس منين ويصرف عليه إزاى؟".
وحول الانتقادات بشأن المشروعات القومية التى تنشأها الحكومة، قال الرئيس السيسى فى حديثه: "ده بيقلل جدا من الجهد اللى بيتعمل، وهيدّى انطباع غير جيد، وكأن الدولة مش عارفة بتعمل إيه، ومستنيين حد يقول لنا خلّوا بالكم من الموضوع ده، ومستعد أسمع بس اللى يكلمنى يبقى فاهم وعارف كويس، وارتباط الموضوع اللى بيتكلم فيه والموضوعات الأخرى، لأنها شبكة مترابطة مع بعضها وكل موضوع يؤثر فى الآخر".
واختتم الرئيس عبد الفتاح السيسى حديثه فى هذه النقطة قائلا: "بفضل الله بنعمل دولة ذات شأن، وهتشوفوا، وبعد سنين مش كتير هيبقى فيه ناس تقول يااااااه، قد كده كان كل ده بيتخطط ويتنفذ علشان تبقى بلدنا بالمستوى ده، شكلا ومضمونا".
