مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
صابنا اللى صابنا.. من لون تيابنا
هتصفّى غانا مع منتخبنا
افطر يا مسعد... يا رب نسعد
كلّ الحزانى.. ونخطّى غانا
إيّاك نعدّى.. ونغيظ فى مجدى
من يوم هولندا.. نازل معانده
عمّال يغيظنا.. قال إيه نقذنا
خطّتنا واضحه.. ودفاعنا أضحى
واقف بشدّه... وف إيده عدّه
اضغط يا ميزو.. واضرب بحدّه...
سدّوا فُرجكو... جايكم فَرجكو
انطح يا كوكو... وادّيها دوكو
مع كلّ ناطحه.. يشطح له شاطحه
كلّ اللى ييجى.. يرجع ببطحه
هذا أوانى.. والكلمه فاضحه
لفّيت حوارى.. ساعة العصارى
ومشيت أغنّى فوق الكبارى:
............
بلادى.... بلادى
يا طَمْعة أعادى الزمن فى القضيه
يا صوت الضمير فى السنين الرديّه
يا قلب الشهيد اللى صار بندقيه
يا ضحكة بهيه لملامح ياسين
بلادى... بلادى... يا كلمة آمين
يا حارة المواردى وضريح الحسين
يا ضلعى المتين فى الأراضى الغريبه
يا كف الزمن ع الدروب العصيبه
يا أول وآخر وأعظم ضريبه
يا صمت الحبيبه فى ساعات التجلى
يا ضلى اللى واقف بيحضن فى ضلى
يا كُلّى اللى داير بيوجع فى كُلّى
سيبينى أبتسم لك وأصومك وأصلّى
وأملّى العيون من ضلوعك وأحلّى
..............
مفطّراتى.. ماشى بآلاتى
ويّايا طبله ومغنّواتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
