كابتن حسن شحاتة اسمح لى انت زودتها شوية.. لأ ده ييجيى مليار شوية.. على طول الخط زعلان.. وغضبان ومخاصم الإعلام، اللى أنت طبعاً عارف أنه بيصنع النجوم.. وطبعاً يا سيدى النجوم برضه بيقدموا جهد، يعنى الإعلام ده مش "سقط متاع".. حلوة سقط متاع دى.. أو مجموعة متسولين ينتظرون رضاك عنهم لتتحدث معهم من أجل نقل الصورة لملايين المصريين اللى وجودهم فى الملاعب وشراءهم للتذاكر وأجهزة التشفير وجلوسهم أمام الإعلانات اللى بتدر آلاف وملايين للسادة النجوم معناه أنهم أصحاب حق أصيل فى معرفة كل شىء لأنهم بالبلدى "الزبون" اللى بناكل عيش من حرقته على المجنونة كرة القدم.. آى والله صدقنى.
أما كونك تظهر وقت ما تشاء وتتكلم مع من تحب من الصحفيين والإعلاميين والبرامجيين وعلى رأسهم طبعاً برنامج "كريم شحاتة"، فده كلام السكوت عليه صعب، لكن أنت بتستغل انه مافيش اتحاد كرة فى البلد وطبعاً كلنا أو أغلبنا من اللى أنت مابتحبهمش قالوا: ذى بعضه يا جماعة الخير "آه الضنا غالى".
لكن أن تظل تعاير المصريين بأنك صاحب الفرحة الأفريقية.. وتنزعج لما نقول لك ليه مارحناش كأس العالم.. فترد وتقول "أنها الفاصلة".. وبعد وكسة النجير كمان ترجع تانى وتقول أنها الفاصلة.. شالاه يا فاصلة وعايزين نعرف لغاية أمتى هانفضل "ولاد الفاصلة"؟!
المصيبة أنك تطل علينا من برنامج مجدى عبدالغنى وتسب الصحفيين والإعلاميين وترفض أى نقد، وتصف من ينتقد أنه ينتقد مصر.. ياه ده كلام خطر.. طب ليه خطير؟!
خطير لأنك كنت دايما بتقول أن عبد الغنى من جماعة كارهينك.. وكنت كمان بترفض حتى تقول له سلامو عليكم وان كنت ناسى أفكرك!
المصيبة الأعظم إنك تنكر كلام عن "المعزة المسحورة".. ماشى.. وكمان تنسى تصريحاتك بتاعت أن عدم تحقيق الفوز معناه "نهاية جيل".. بس ماقلتش أى جيل.. وهل فيه جيل بينتهى ويبقى قائده؟!
كمان تصريحات المدرب شوقى غريب عن صدمتكم فى اللاعبين وأنهم تعروا غريبة جدا.. وكان "أبوالشوق" عايز برضه يشتم فى الصحفيين بس غير رأيه بسرعة لأن لميس الحديدى مقدمة برنامج "من قلب مصر" كانت هاترفض!
كابتن حسن تهديدك بأن اللى ينتقدك يبقى بيكره مصر.. اعتبره كلام فاضى.
كابتن حسن تصريحك لكريم شحاتة بعد المباراة بأنك تفكر فى الاستقالة كلام مفهوم، لأنه هايعقبه أن الأخ سمير زاهر اللى مش لاقى أى قشة تنجده من فساد الجبلاية هايخرج بسرعة ويقول: نجدد الثقة.. وأنت هاتقول اللى قلته بأنك مش هاتستقيل.. وهاتفضل موجود إلى 2014 ربنا يديك الصحة، وآهه ساعتها هاتكلمنا برضه عن "الفاصلة".. وهاتقول أنك مواصل إلى 2018 بجيل جديد فأنتظرونا بعد الـ.. ولا بلاش!
كابتن حسن تهديدك بالمشهد الرئاسى الكريم وأن اللى هايتكلم معاك معتد آثم لأنه ينقد رجل كرمه الرئيس مبارك ده كلام ماينفعش.. لأن الرئيس مبارك نفسه بيخرج للناس يتحدث معها ويسمعها ويناقشها.. أما أنت فالناس بالنسبة لك على الهامش.. لأنك مدير فنى "مش للحبايب"!
كابتن حسن عرقك وجهدك فى عيوننا وعلى رؤسنا، لكنك ليست متبرع فالست مصر بتدفع لك كويس اوى اللهم لا حسد.. يعنى أنت محترف مش متطوع؟!
كابتن حسن عايز أقول لك أن سبك للإعلام خط أحمر.. لا يجدى معه أن تقول أنك تقصد مجموعة قليلة الأدب وقال ايه فى مجموعة تانية مؤدبة ومهذبة ربنا حباها بحبك.. يا سلام يا معلم إيه ده!
كابتن حسن الإعلام صنع نجوما أكبر منك فى كل فروع الحياة.. وسيظل يصنع نجوما آخرين.. والإعلام باق وأنت ستغادر إن آجلا.. أو عاجلا.. ويا معلم فيه ناس قدموا للبلد دى مش كئوس أفريقية كروية.. لكن أرواحهم أيضاً.. وماحدش فيهم بيعمل اللى أنت بتعمله فى خلق الله.. اللى الواحد فيهم ممكن يروح بآخر 5 جنيه فى جيبه لتشجيع منتخب مصر اللى أنت مدربه.. لكن يبدو أنك فاهم غلط أنك أصبحت فوق ملايين المصريين الطيبين.
كابتن حسن ربنا يسترها معاك وترجع أبوعلى الطيب.. وأهى كانت ما شبه ذى الفل.. تحب أفكرك أنك أتغيرت كتير.. وعلشانه كده وصلت أنك تتغلب من النيجر يا راجل.. وتقول أن التعادل مع سيراليون بدعاء الملايين فى ستاد القاهرة، والهزيمة النكراء من النيجر.. عادى وبتحصل فى أحسن العائلات الكروية.. يبقى أنت صحيح مش حسن شحاتة اللى كنا نعرفه.
كابتن حسن الحمد لله أن سحرة النيجر غلابة وظروفهم وحشة جابوا "معزة" وفازوا بهدف واحد.. لأن الناس دى لو ظروفها المادية كويسة وجابوا "عجل بقرى" كانوا فازوا بخمسة أهداف طبقا لنظرية السحر اللى بعتتها الصحافة من النيجر مش من خيالنا.. صح؟!
مشاركة
اضف تعليقاً واقرأ تعليقات القراء
مشاركة
