احترام مصر موضوع أكبر من بيزنس زاهر.. بس يجبر روراوة على احترامه

يا عالم.. هو فيه كده فى الدنيا.. ولاّ فى الآخرة حتى؟!
معقولة كل حاجة تبقى مسخرة.. سواء من «التسخير».. أو من «المسخرة» لحساب الريس زاهر لمجرد أنه بيلملم شنطته انتظاراً لانتهاء ولايته على جبلاية الكرة.. واستعداداً لجولة جديدة فى الاتحادات التانية اللى زى الاتحاد العربى.. والاتحاد الشمال أفريقى ربنا يخليهم لسيادته باعتبارهما قبلته اللى جاية.

طب احنا مش ضد حاجة زاهر للسفر والتجوال والتمتع بالنجوم السبعة فى الاتحاد العربى والهدايا الثمينة.. والبدلات الدولارية العظيمة، ولا حتى بالشريحة الأقل فى اتحاد شمال أفريقيا «السرى للغاية»، لكن بطبيعة الحال لا يمكن أن تتوقف مسيرة الكرة المصرية انتظاراً لقبول أوراق السيد زاهر فى الاتحاد العربى.. وأيضاً لن نسكت طويلاً على وضع كرامة اللعبة الشعبية الأولى فى مصر على أعتاب بوابات الشمال الأفريقى التى يريد زاهر أن يحج إليها، بعد أن يموت موضوع روراوة أفندى اللى مابيفوتش فرصة «يترسم» فيها على زاهر أبداً.
آخر أقوال روراوة اللى زاهر مش هايرد عليها كالعادة هى أن روراوة أفندى لا يعرف زاهر ولا مصر! آى والله تخيلوا.؟. قالها وهو بيستقبل منتخب الجزائر للمحليين بعد وصوله لأمم أفريقيا للمحليين!.

والسيد زاهر ودن من طين والتانية من عجين!
الموضوع بقى بايخ جداً، فى الاتحاد العربى قفل «الجبلاوى» أو سمير زاهر «خاشمه» خالص انتظاراً لحل من قبل رجال الأمير سلطان بن فهد ينهى أزمته مع روراوة أفندى لأن كليهما مرشح للتواجد فى مجلس الاتحاد العربى. لكن الأفندى، يعنى روراوة، عارف أنه مستمد قوته من منطق أن اللى يجيب سيرة الجزاير تبقى «وقعته هباب».. وياعينى لو جاب سيرته هو شخصياً.. اسألوا زاهر بيعمل إيه الافندى.. يالهوى.. يالهوى؟!

أما الجبلاوى رئيس اتحادنا.. وقدرنا.. فمشغول بحاجات تانية خالص زى ما قلنا.. فلا أصوات له بدون حصاد رجال الأمير سلطان، ولا نفوذ لاتحاده فى كوتة الاتحادات الكروية العربية ليسعى للفوز بأصواتها، ببساطة لأن طلباته دايماً خاصة جداً.. وأشقاؤنا العرب زهقوا جداً خالص من طلباته اللى مالهاش نهاية.. وهو عارف كده. طيب هو عايز اتحاد شمال أفريقيا يعيش علشان شوية البطولات اللى بتتسوق للفضائيات، وشوية السفريات والبدلات.. هو حر، بس يقول لنا إن الانسحاب من اتحاد شمال أفريقيا أمر حتمى ويرجع تانى يفتح الباب والشباك، ويعطى موافقات سرية شمال أفريقية على المشاركة فى البطولات الكروية.. فده بقى اللى كلام فاضى وفارغ من أى معنى لاحترام وضع الكرة المصرية.. وأقول الكرة المصرية، لأن احترام مصر شأن أكبر من «بيزنس زاهر» ومليون زاهر، لكن على الأقل لازم يسخن شوية ويجيب للكرة المصرية حقها ويعيد لها احترامها.. والله على الأقل، بدل ما يقول لنا إن فيه تقرير خطير رفعه الجزائريون للفيفا فنلاقى تقريرين؟!

وبدل ما يقول لنا إنه كلم بلاتر وعرف أن الفيفا لن تعاقب مصر فنجد أن العقوبات فرضت علينا!

يا سيد زاهر الدنيا مش لك لوحدك.. وإنت عارف كويس إن كل شىء له نهاية.. وكفاية اللى حاصل لك فى اتحادك الجبلاوى من فوضى وواسطة ومحاباة لناس على ناس. مش كفاية إنك فى اجتماع مع المدربين بتوع المنتخبات يحتد عليك الجميع من كل الأجيال مصطفى يونس وغريب ورمزى والكل، وطبعاً عارف سبب حدتهم، لأن كل واحد فيهم عارف العلبة كان فيها إيه؟!

وكفاية أنك دعيت لاجتماع لتفعيل قرار منع المدربين من الظهور فى الفضائيات كعمل إعلامى والتفرغ للكرة، فينقلب الاجتماع لتوسلات منك أن يرحموك، وبلاش يبطلوا يظهروا فى الفضائيات يعنى يظهروا بس يدافعوا عنك؟!

بذمتك يا شيخ عمرك شفت فى العالم من البرازيل لليمن السعيد مدربين بيطلعوا يحللوا الكرة وهم متعاقدون مع المنتخبات؟!

طب يا أخى خلوا فى عيونكم شوية ملح.. واطلب منهم يحللوا مباريات دوريات أوروبا.. أو كأس العالم.. أو بطولة الأندية الأوروبية، آهه حتى يبقى كلام محترم!

المهم.. أو نهاية القول.. لازم يا كابتن تعرف إن موضوع كرامة مصر ده موضوعنا كلنا كمصريين والبلد فيها رجالة إنت أول واحد عارفهم.. وعارف إنهم سايبينك علشان فضيحة استبعادك لن يستفيد منها إلا روراوة أفندى، فعلى الأقل حاول.. آى والله حاول أن توقف هذا الروراوة عند حده.. أو أى حد حتى.. واجبره على احترامك أنت فقط.. طظ يا أخى فى أى اتحاد على حساب كرامة النفر مننا والله.