.. «حصاوى على المقهى وإلى جواره رجل شهرته أبوجهل»
أبوجهل: ناوى تنتخب مين يا حصاوى لمجلس الشعب؟
حصاوى: والله لسه بفكر.
أبوجهل: ودى عايزه تفكير؟ تنتخب أى مسلم طبعا.
حصاوى: قصدك ما أنتخبش قبطى؟
أبوجهل: والقبط ما لهم أساسا؟ بقول لك تنتخب مسلم.
حصاوى: طب ما هو أغلبية المرشحين مسلمين. تقصد مين فيهم؟:
أبوجهل: مش صحيح لأن فيهم مرشحين علمانيين وليبراليين والعياذ بالله.
حصاوى: تقصد أنهم كفرة؟
أبوجهل: طبعا وهى دى عايزه نقاش؟ إنت هتفور دمى ليه؟
حصاوى: طب من غير ما تزعق لى.
أبوجهل: أنت تفهم أكتر منى؟
حصاوى: لا الحقيقة أنا ما بفهمش فى السياسة خالص.
أبوجهل: ولا فى الدين.
حصاوى: لا فى الدين بفهم شوية.
أبوجهل: ما دام ما بتفهمش فى السياسة تبقى ما تفهمش فى الدين. لأنهم شىء واحد.
حصاوى: طيب خلاص. أقول لك أنا أنتخب شيخ الأزهر أو المفتى. أكيد دول بيفهموا فى الدين أحسن منى ومنك.
أبوجهل: غلط. فيه كتير بيفهموا أكتر منهم. ثم شيخ الأزهر والمفتى مش مرشحين أساسا.
حصاوى: هما ممنوعين يترشحوا؟
أبوجهل: لأ. هما اللى مش عايزين يترشحوا. شوف حد غيرهم.
حصاوى: والله ناس قالوا لى إن فيه راجل كويس كان لواء فى الجيش و..
أبوجهل: «مقاطعا» اوعى. إنت اتجننت تنتخب ضابط جيش؟
حصاوى: ليه هما ولا مؤاخذة مش مسلمين؟
أبوجهل: لا بس ما يصحش نخلط الدين بالجيش.
حصاوى: طب ما تختار لى أنت حد.
أبوجهل: أنا عايزاك تختار بحريتك، اختار حد من الإخوان المسلمين أو حد من السلفيين.
حصاوى: غششنى أنت هتختار مين فيهم؟
أبوجهل: أختار مرشح أخوانى ومرشح سلفى عشان اضمن أن التيار المتدين هو اللى يكتسح الانتخابات.
حصاوى: وأعرف برنامج ده من ده إزاى؟
أبوجهل: سهلة خالص. الإخوانى تلاقيه لابس بدلة إفرنجى وبدقن كبيرة وشنب. السلفى تلاقيه بجلابية وطاقية، وله دقن كبيرة ومالوش شنب.
حصاوى: بالحق صحيح فيه مرشحين بيغروا الناس بالفلوس؟
أبوجهل: دول فلول العهد البائد. لكن المتدينين بيوزعوا لحمة هُبر.
حصاوى: طب ما تقول كده م الصبح.
أبوجهل: بس كده؟ بارك الله فيك. يكفيك كام كيلو؟
«حصاوى يغشى عليه»
مشاركة
اضف تعليقاً واقرأ تعليقات القراء
مشاركة
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
انس نصر
منين الرملي ده؟؟؟
عدد الردود 0
بواسطة:
يحيي رسلان
بايخه
عدد الردود 0
بواسطة:
ايوب المصري
كاتب رائع حقا
انها مفالة محترمة حقا ومفكر حقيقي
عدد الردود 0
بواسطة:
raafat
لا تكن سطحي
عدد الردود 0
بواسطة:
مصري
بيوزعوا لحمة هُبر
عدد الردود 0
بواسطة:
مصري
المسابقة
عدد الردود 0
بواسطة:
مصري
أبو جهل وحصاوي في نفس الوقت
عدد الردود 0
بواسطة:
انا عارف انك موش هتنشر
لالا