اللهم لا شماتة يا معلم.. وعتاب للمنيسى

كابتن حسن شحاتة إيه لزوم كل العناد ده.. وليه بتتكلم عن شامتين ومين اللى هايشمت فيك؟!
غلبتنا يا معلم، كل يوم تصر على مخاصمة الشعب، يا كابتن حب مبارك زى ما أنت عايز.. سواء لأنه نفعك.. أو لأنك استفدت فى عهده.. مايهمناش، لأن المهم لكل مصرى إنك المدير الفنى لمنتخبنا الوطنى.. عارف يعنى إيه؟!
يا كابتن.. مدير المنتخب لازم يكون كبير فى تصرفاته، يعنى يتكلم مع الصحافة ويقول الحقائق.. عادى مش كده!

يا كابتن.. مدير المنتخب.. أو منتخبنا لازم يعرف أنه فريق كل المصريين مش فريق سيادته هو وعائلة الرئيس السابق المخلوع الفاسد بشهادة محاميه اللى هايدافع عنه!

يا كابتن.. مدير منتخبنا ماينفعش يستبدل إعطاء الأخبار «حصرياً» لابنه كريم بتكوين لوبى صحفى يتعطف ويتنعم عليه ويعطى أعضاءه أخبار المنتخب وكأن باقى الزملاء الصحفيين والإعلاميين مطرودون من جنتك!
يا كابتن.. مدير منتخبنا غير مسموح له أن يكون المانح المانع.. ولن نسكت بالطبع، لأنه مش «عزبة».. ده منتخبنا.. عادى!

يا كابتن.. مدير منتخبنا لازم يكون واضح، يعنى لما يكون عايز يرحل، لأن صديقه الرئيس وأولاده خرجوا إلى غير رجعة.. بلاش يطلع يعمل خناقة علشان يبرر الفشل الذى لا نتمناه لتاريخ حسن شحاتة بتاع زمان.. قبل التوريث الإعلامى.. وإدارة منتخبنا بطريقة العزبة.. والاكتفاء بأحد رجال سمير زاهر كمستشار إعلامى.. بالطبع لازم يفشل، لأنه غير مؤهل.. وبالطبع ده اختيارك.. لأنه زى ما أنت بتقول: غلبان وعايز ياكل عيش.

يا كابتن.. مدير منتخبنا لازم يطلع يعتذر للثورة عن رقصه على أتوبيس شركة البترول اللى ابنه بيشتغل فيها لمبايعة الرئيس الفاسد باعتراف محاميه.. والاتحاد الأوروبى وأمريكا كمان.. عادى!

يا كابتن.. مدير منتخبنا لازم يعرف أن الوطن ده مافيش حد صاحب فضل عليه، وأنك أخذت حقك وزيادة واسأل.. وبرضه راضيين عادى خالص!

يا كابتن.. مدير منتخبنا ماينفعش يفكر بطريقة «جدتى» والعصور الوسطى كمان ويقول: «الشامتين والحاجات دى.. يظهر أنك بتفكر فى الرحيل.. بس عايز حد يرحلك.. زى الجماعة أصحابك.. بس والله هذا الشعب لا يعرف إلا مقولة: اللهم لا شماتة.. عادى برضه.
> صديقى وزميلى إبراهيم المنيسى أحد الصحفيين الموهوبين.. لى عندك عتاب.. كتبت فى مقالك بجريدة الأخبار: «لمصر.. لا لصقر».. وتهكمت بشياكة على من يطالبون صقر بالرحيل.. وأردفت بأنك تطالب بأن يقدم من يمتلك مستندات أن يقدمها..

صديقى العزيز المنيسى.. والله لو أقسمت لى بالعيش والملح والمهنة أن هؤلاء ليسوا فاسدين فسأصدقك.

صديقى الحبيب المنيسى من يطالبون بالتغيير لا يمتلكون مستندات.. وراجع موقف الرئيس المخلوع.. والصحافة الحكومية.. اللى قال إيه قيادتها كانت مخدوعة.. وبعدين نتكلم.
صديقى الحبيب.. نفسى تطلب أن يخرج أى فاسد سواء فى الأندية أو الاتحادات عندما يلقى عليه أمثالنا من الحاقدين المعطلين للدولة الاتهامات ليقول الآتى: أنا فلان رئيس الأهلى أو الزمالك أو اتحاد الكرة أو أحد المجالس، شباب كانت أو رياضة أو أوليمبية.. دخلت الرياضة معايا كذا.. وورثت عن خالتى كذا.. وعن أبى كذا.. وأعمل بكذا.. وأدفع ضرائب كذا.. والآن معى كذا.. إيه رأيك وقتها يسكت أمثالنا وتتصلح البلد بعد أن يغادرونا.. ولا هانت علينا أنفسنا؟! > >