حصاوى جالساً بالمقهى بجوار شاب
الشاب: خبر كويس قوى، أهالى شهداء الثورة بيصرفوا لهم التعويضات.
حصاوى: للأسف دا قرار اتأخر قوى.
الشاب: ما تنساش إن عددهم كتير، بيقولوا 1200 اتقتلوا وحوالى 8 آلاف مصاب.
حصاوى: بس؟ أنا كنت فاكرهم أكتر من كده بكتير أنت متأكد إن الإحصاء دا دقيق.
الشاب: قولى، ماحدش من قرايبك أو معارفك استشهد فى الثورة.
حصاوى: كتير، بس معرفش عددهم، حد يعرف كام ألف بالظبط استشهدوا فى حرب 56 فى سينا وبورسعيد؟
الشاب: بدهشة حرب 56؟
حصاوى: بلاش كام واحد ادّبحوا فى حرب اليمن؟ أو فى الكونغو لما رحنا نحارب هناك؟
الشاب: إحنا لنا عساكر حاربوا فى الكونغو؟
حصاوى: طبعاً دفاعاً من استقلال قارة أفريقيا - بلاش - كام واحد استشهدوا فى حرب 67؟
الشاب: أنت مخك راح لفين؟ أنا بتكلم عن ثورتنا.
وحصاوى: وأنا بتكلم عن ثورتنا.
الشاب: لا أنت بتتكلم على ثورة 23 يوليو؟
حصاوى: وهى ثورة 23 مش ثورتنا؟
الشاب: ثورتنا طبعاً، بس دا تاريخ قديم.
حصاوى: يعنى اللى فات مات ودم الشهداء فيها راح للأبد؟
الشاب: بلاش سفسطة، الحرب دى مات فيها المصريين دفاعاً عن أرض مصر وكرامتها.
حصاوى: وعشان دافعوا عن أرض مصر وكرامتها يبقى مانعرفش عددهم بالظبط ولا ياخدوا تعويضات زى ثورة 25 يناير اللى برضه دافعوا عن حرية وكرامة المصريين؟
الشاب: الحروب دى كان المسؤول عنها الاستعمار والصهيونية.
حصاوى: بس المسؤولين بتوعنا هما اللى أمروا المجندين من شبابنا بالانسحاب من كل مرة ومن غير ما يحاربوا.. يبقى المجندين اللى ماتوا فيها مش شهداء؟
الشاب: شهداء.. لكن..
حصاوى: «مقاطعا» كام عددهم بقى وخدوا تعويضات إيه؟
الشاب: قصدك المسؤولين بتوعنا كانوا هما المسؤولين؟
حصاوى: اللى أعرفه إن وقتها المسؤولين عندنا ما كانوش مسؤولين عن أى حاجة، بدليل إن الناصريين داخلين الانتخابات.
الشاب: إنت عايز توصل لإيه بالظبط؟
حصاوى: يتحاكم اللى اتسبب فى قتل المجندين عساكر وضباط وأهالى، محاكمة علنية وياخدوا تعويضات، دا غير اللى اتحبسوا ظلم أو اتعذبوا فى المعتقلات.
الشاب: ومين المسؤول عن دا كله فى رأيك؟
حصاوى: «يتلفت فى خوف وينهض» أنا ماشى، ما تودنيش ورا الشمس!
الشاب يغشى عليه
مشاركة
اضف تعليقاً واقرأ تعليقات القراء
مشاركة
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
جناح النسر
أول مرة احسك بتستهبل يا استاذ لينين
عدد الردود 0
بواسطة:
ياسر محمد
بايخه
بايخه
عدد الردود 0
بواسطة:
د.مينا جورجى
انت شخص رائع يا استاذ لينين