لا أعرف لماذا يصر الكابتن حسن فريد نائب رئيس اتحاد الكرة على فكرة قطع رقبة اللاعب اللى ها يجيب سيرة إسرائيل.. وسنينها.. وربما نصل إلى قطع «رجل اللاعب» علشان يبقى أبورجل مقطوعة!
كابتن حسن.. نحن نغنى من زمن بعيد، وبشكل فردى وجماعى وشعبى: إحنا بنكره إسرائيل، بس ياخسارة ساعتها الدولة كانت عارفة ليليتها إن الاتفاقية سارية و100..100!
علشان كده.. ولأن حسن فريد من رجال الأعمال الذين يتعاملون مع الخارج وبيعرف لغات أجنبية كمان، كان لازم نقول له.. بلاش تتكلم عن تطبيق أحكام شريعة الكراهية الشعبية على الكورة.. علشان شكل البلد دى مايبقاش وحش وفى غاية السوء أمام العالم، الذى لا يهمه من قريب، ولا بعيد، ولا فى النص ما بيننا وبين إسرائيل من عداء تستحقه بدرجة امتياز!
كابتن حسن.. كل ما سيقال عن مصر إننا عنصريون.. ولدينا تفرقة عرقية ودينية!
كابتن حسن.. أحسن حاجة تعملوها تشوفوا وظائف للاعبى الكرة.. أو حتى تعينوهم فى جماعة جديدة، وليكن اسمها مثلا.. الأمر بلعب الكرة فى مصر، والنهى عن اللعب فى إسرائيل؟!
كابتن حسن.. إيه رأيك، لو تخرج تقول: هانقطع لسان إللى يقول: مافيش كورة؟!
كابتن حسن.. بلاش تقول هاتقطعوا لسان اللى يقول مافيش كورة.. على الأقل تقول: الحكاية دى ملناش دعوة بيها.. إحنا ناس جايين نقضى أيام فى الجبلاية، بلاش أى حد يزعل مننا.. بلاها كورة، وخليها تبدأ من اللعب بالناشئين والشباب.. إلى أن يأذن أولى الأمر بعودة الكرة..لكن أن تظل تخرج علينا.. لتغنى أغنية إنك بتكره اللى هيلعب فى إسرائيل بدون أن تدرس كنائب رئيس اتحاد الكرة مشروعا شعبيا إعلاميا لعودة اللعبة فهذا هو التهريج بعينه.. ولا أظن أنك ممن يمكن أن يعملوا لحساب الغير.. زى البيع والشراء لحساب الغير كده؟!
مشاركة
اضف تعليقاً واقرأ تعليقات القراء
مشاركة
