«حصاوى بالمقهى مع جاره»
الجار: قولى يا حصاوى وصلوا لإيه فى قضية مجزرة بورسعيد؟
حصاوى: يا خبر.. ما قريتش الجرايد؟
الجار: قريت إن النيابة لسه بتحقق.. وما فهمتش لجنة تقصى الحقائق اللى عملها مجلس الشعب وصلت لإيه.
حصاوى: إبقى حاول إنت تستنج مين اللى عملها.
الجار: البلطجية.
حصاوى: قديمة.
الجار: فلول النظام القديم.
حصاوى: قديمة أكتر.
الجار: يكونش إهمال جهاز الأمن؟
حصاوى: إشمعنى؟
الجار: إنت هتخش لى قافية؟
حصاوى: إشمعنى الأمن يتواجد فى كل المباريات المهمة إلا دى؟
الجار: يبقى فيه طرف تالت.
حصاوى: عليك نور.. بس هو مين؟
الجار: يمكن اللهو الخفى؟
حصاوى: براوه عليك.. بس برضه هو مين ؟
الجار: وأعرفه إزاى وهو خفى؟
حصاوى: ما خلاص اللهو الخفى اتكشف واتفضح ورايح فى داهية.
الجار: طب ما تقولى هو مين.
حصاوى: جمعيات حقوق الإنسان الأهلية. أصل المسؤولين عندنا اكتشفوا إن بعضها بياخد تمويل من بره زى أمريكا وألمانيا وغيرهم. يبقى أكيد استغلوا الفلوس دى وأجروا ناس مصريين يعملوا المذبحة.
الجار: ويعملوا كده ليه؟
حصاوى: لأن أمريكا وألمانيا عندهم فى النوادى بتاعتهم ألتراس حاقد على الألتراس بتاع الأهلى. قوم إيه حبوا يعملوا فتنة بينه وبين الألتراس بتاع النادى المصرى. قوم استخدموا التمويل الأجنبى فى عمل المذبحة.
الجار: أنا افتكرته موضوع سياسى.
حصاوى: ما هى المباراة دى موضوع سياسى يا بنى آدم.. إنت حصاوى؟.. أكيد الجمعيات دى مش عايزين يسمحوا للمنتخب القومى ياخد بطولة إفريقيا تانى.. قاصدين ما نفرحش. لأننا لو خدنا بطولة إفريقيا: ما فيش حاجة تقدر تقف قدام ثورتنا بعد كده.. اربط دا بقى أن مدرب فريقنا القومى أمريكى.
الجار: آه والله عندك حق. ورأيك نعمل إيه؟
حصاوى: أولا بتوع الجمعيات دى محبوسين وبيتحقق معاهم لأن ما خدوش تصريح بالعمل. ثانيا نقدر نسيب عليهم الجمعيات الأهلية اللى عندنا وما لهاش ترخيص برضه: تاخد تمويل من بلاد عربية وترد عليهم.
الجار: زى إيه؟
حصاوى: جماعة الإخوان المسلمين مثلا.
الجار: هايل ومين العبقرى اللى اكتشف الملعوب دا كله؟
حصاوى: عيبك إنك مش متابع اللى بيحصل فى المنطقة.. المفتش كورمبو طبعا!.
«الجار يغشى عليه»
مشاركة
اضف تعليقاً واقرأ تعليقات القراء
مشاركة
