عايزين واحد بس يقول الحقيقة

والله العظيم تلاتة حرام عليهم اللى بيحصل للشعب العظيم ده.. والمقصودون بالقسم، واللى حرام عليهم بالطبع هم الأحزاب السياسية.. وكل من وعد الشعب النبيل الذى قدم خيرة أولاده للثورة وكان ينتظر فقط أن يعيش بكرامة.. نعم بكرامة!
الحرية والعدالة الأغلبية.. النور السلفى باقى الأغلبية.. أين أنتم من الرد على «فكرة» الإبقاء على رجل كان يعمل مع فتحى سرور والعياذ بالله بدعوى أنه يفهم فى إجراءات مجلس الشعب!
هذا الرجل أمواله تحت سيطرة القانون، وبالتالى يتم التحقيق فى مصادرها من خلال جهاز الكسب غير المشروع، وأظن أنه سبب كاف لمنعه من السفر.. فكيف سافر «مهران» أحد رجال سرور الذى هو ترزى قوانين المخلوع مبارك مع الكتاتنى؟!
هاتقولوا كلام قديم ومعاد.. طيب.. إيه الجديد، وكيف يأتى الجديد؟!
والله العظيم تلاتة العبد لله ويجى كام مليون راضين بأى إجابة.. عن سفر «مهران» سرور.. وإثبات عدم وجود جنسية، وأى ربع إجابة عن المظاهرات التى تعطل الحركة والسباب لكل من يختلف معهم؟!
عايز أقول أوعو حد يفكر إن الأغلبية بس هى اللى «مابتعبرش» الشعب.. لأ.. ده القوى المدنية والبرادعية وغيرهم.. وغيرهم.. فلا كلام.. أى كلام عن ضرورة تحديث البنية الأساسية للتظاهر «مدنيا» بطريقة تظهرنا أمام العالم بصورة أقرب للتحضر، ولا أى 8/1 كلام عن أى شىء غير أنهم سيكشفون الخونة بس فى الوقت المناسب!!
يارب نعيش إلى أن يأتى الوقت المناسب.. والرجل المناسب فى كل المناصب.. والله هايحصل.. ربنا كبير.