شيكابالا واللعب على «الشناكل»

شيكابالا بدأ اللعب مع مجلس إدارة الزمالك «وحط لهم» العقدة فى المنشار وقال «مافيش إعارات».. لو مش عايزينّى «سيبونى وبيعونى».

طبعا كلام الفتى الأسمر لم يأت من دماغه لكن فيه ناس ولاد حلال بيلعبوا فى رأسه وبيحركوه، والغريب أن الناس دى من داخل مجلس الزمالك اللى فيه مصالح بينهم وبين اللاعب وأقسموا له بعد الأزمة مع المعلم أنهم فى صفه ومستحيل يأخذوا أى قرارات ضده، ولما الدنيا قامت على شيكابالا وأصبح عقابه مطلبا شعبيا بداعى الحفاظ على المبادئ، وحصل أعضاء المجلس (أصدقاء اللاعب) على موافقته بإصدار قرارات تهدئة للرأى العام الزملكاوى، وهم نفسهم اللى قالوا القرارات من الكنترول. وكمان قالوا الحلول وكيفية مواجهتها.

وبعد يومين هنلاقى الأخ عبدالتواب المحامى يسرب للإعلام أن الأهلى بيتحرك لشراء شيكابالا ومش بعيد يدى مواعيد عن لقاءات سرية من عدلى القيعى مدير التعاقدات الحمراء مع اللاعب فى فيلا شبرامنت، وطبعا نلاقى الجماهير البيضاء تتعامل بطبيعتها وتهاجم مجلس الإدارة الزملكاوى وتطالب ببقاء اللاعب وقتل المبادئ مع كام تليفون من ممدوح عباس مع حسن شحاتة وابنه كريم علشان يعفو عن شيكا، وكلمتين على «ترضية» يخرج بيان وهمى باعتذار شيكا للمعلم، وممكن يقولوا إنه ماكنش يقصد شحاتة والناس فى البيوت فهمت غلط وكان قصده الراجل اللى وراء المعلم، وتنتهى الحدوتة وترجع ريما لعادتها القديمة.. زمالك كبير بلا بطولات.. وجماهيره تتحِرق.