إلى عامر حسين.. الكورة رايحة فين؟!

إذا أردتم أن نشعر بالتغيير والتطوير.. والتنوير، فعلينا أن نفتح الملفات كلها.. بس الملفات الحقيقية.. مش «الملفات» اللى فيها مسخرة التهم السابقة التجهيز!

من ناحية نفتح الملفات التى تحوى المعلومات.. ومن ناحية أخرى نمد «الخيط» على امتداده.. بدلاً من أن يتحول الخيط إلى حبل يشنق الكل ويستفيد «عشماوى» فقط، لأنه تحول فجأة إلى ملاك؟!

فتح ملفات يماثل عملية جراحية لتنظيف جرح غائر.. كله بلاوى.. يماثل «الدمامل» والعياذ بالله فى موروثنا الشعبى وما فيها من «صديد».. مش حديد؟!

إذن نحتاج معلومات.. نحتاج احترام الشعب.. وده بالطبع يحتاج أن نبدأ بالفعل فى رفض شامل لإخفاء المعلومات.. ده حتى العدو الصهيونى قرر بعد مرور أعوام أن يفتح بعض صفحات ملف حرب «73» حرب أكتوبر.. فمتى نفتح بعض ملفاتنا ولو الكروية بس!

السيد عامر حسين.. «كأنه» رئيس الاتحاد على رأى الزميل أكرم القصاص رئيس التحريرى التنفيذى!!

طيب.. ليه السيد عامر حسين مش عايز يعبرنا.. ويقول لنا إيه الحكاية.. الكورة رايحة على فين سيادتك.. فيه حاجة غلط ولا.. لأ.. فيه كائن من كان مسيطر.. ولا.. مفيش؟!
لو.. فيه تبقى مصيبة.. لو مافيش.. دى تبقى أم المصائب!

السيد عامر حسين، لا عايز يقول اللوائح بتقول إيه.. ولا عايز يوضح الحق مع عبدالحق «النهون» فيهم؟!

أخيرا.. السيد عامر حسين.. أنت عامل إيه دلوقت.. يعنى مبسوط.. زعلان.. على البلد دى.. ولا أنت اسكندرانى.. يا عم قول.. اتكلم، بدل ما فلول الأمس.. عاملين ثوار اليوم.. وهايدمروا الشباب.. الشباب اللى رجع لنا كامل رجولتنا ياعم الحاج عامر.. وحياة النبى.. تتكلم.. كلنا آذان صاغية.. حلوة دى!!