ليه مكتوب علينا نظل أسرى العودة للخلف، لدرجة إن ناقص نضع يافطة على صدر بوابات مطار القاهرة وكل منافذ وحدود مصر نكتب عليها: احترس البلد دى بترجع للخلف؟!
كل واحد عايز يتكلم عن نيلها، وشوارعها، والنضال، والجهاد، وكل الأسماء والأوصاف الكبرى دى!
يعنى لازم تكون محترف عايز تعيش كويس وتكسب كويس وتعرف- لو عايز- كويس، بس لازم وأنت ماشى لازم تبكى وتقول: والله بحبها.. ومستمرون وعائدون ويحزنون!
يذهب حسام البدرى فى مهمة احترافية يستحقها، اختارها عاجباه.. أى حاجة، إنما لازم يظل يردد: البيت الكبير هو الأهلى.. والله كان على عينى.. وكلام مجعلص، لدرجة أنه قبل العقد الجديد، يظل الهتاف باقون مكملون.. إيه ده؟!
مين يقول كده؟!
جوارديولا غادر البارسا، ثم أعلن وجهته، آى والله!
طب خدوا دى.. هانيكس المدير الفنى الذى حصد كل البطولات لبايرن ميونخ عقده منتهى ولازال يلعب ويقاتل!!
إيه المشكلة؟!
المشكلة إننا أسرى لفلكلور، أن المدرب مسكين واللاعب يكسب ملايين.. وده حقه.. بس لازم الجماهير تبقى حزنانين!
يا ناس حرام.. كفاية.. أنتم عايزين إيه من البلد التى أعطت كل شىء؟!
كان فيها إيه لو تحدث البدرى قبل أيام أو أسابيع على وجه التحديد، بجسارة عن انتقاله لمهمة أخرى؟.. فيها إيه لو حلل- وليس برر- هذا الذهاب بأنه عقد لا يمكن أن يتركه؟!
طب لو كان هناك طلبات رفضت له- كما أشيع- من الأهلى سواء تقنية أو مادية.. يطلع ويقول.. إنما ليه.. هل يعتبرون الناس مجرد بضاعة بالنسبة لهم؟!
لأ.. يبدو أنها أزمة احتراف.. فهم ليسوا محترفين كاملى الأوصاف الاحترافية.. صدقونى!
يا عم كنت خد جرعة أكسجين، وروح طالع مرة واحدة زى الإعلان، بس خليها اشرب أكسجين واسترجل.. مش الناس أو المتلقى لأنك يا عم راجل وسيد الرجالة.. بس البلد دى فيها رجالة برضه لا إيه؟!
نفس الكلام ينطبق على الإدارة الحمراء، فهى لم تخرج لتقول الحقائق التى تهم الشارع الأهلاوى.. ولا أدرى لماذا ستظل المعلومات محجوبة.. طب الأول كانوا بيقولوا حصرى علشان يظلوا الأغنى.. آهو الفقر حاطط عليهم صحيح بسبب اقتصاديات ما بعد الثورة، لكن كان يجب أن يكون الأهلى سباقا.. ويخرج للإعلان المبكر.. حقاً اشرب أكسجين واسترجل اللى بتتكلم معاه.. واللى أكل عيشك لن يأكل من الضحك على قفاه!!
مشاركة
اضف تعليقاً واقرأ تعليقات القراء
مشاركة
