تات تراراران تن تن

طب نعملك إيه تانى عشان تضحك؟
أصلا الضحك بيقلل الضغوط النفسية وبيعزز جهاز المناعة، وبما أننا مصريون نعيش فى دولة متخلفة طبقا للتصنيف العالمى فإن ضغوطك النفسية مهولة، وجهاز مناعتك بعافية ولا حول ولا قوة إلا بالله، فلماذا لا تضحك.
الضحك من غير سبب ربما يكون مستهجنا، لكننا وبفضل الله هيأنا كل الظروف لحضرتك حتى تضحك ملء شدقيك دون أن يتهمك أحد بعدم وجود المبرر.
مرة حسنى مبارك حكم المصريين 30 سنة على سهوة.. تات تراراران تن تن.
مرة الناس نزلت فى الشارع 18 يوم وخلعت مبارك.. تات تراراران تن تن.
مرة المجلس العسكرى مسك الحكم وحبس مبارك وطلع أسخم منه.. تات تراراران تن تن.
مرة حصل استفتاء فى مارس 2011 والشعب كله قال نعم عشان يخش الجنة.. تات تراراران تن تن.
مرة الإخوان نطوا ع الثورة وع الحكم وجابوا واحد اسمه مرسى وعملوه رئيس.. تات تراراران تن تن.
مرة مرسى كان فاشل وعاجز وكل ما تيجى تعترض عليه يقولك ادوا الراجل فرصة.. تات تراراران تن تن.
مرة الإخوان بعد ما نطوا ع الثورة وع الحكم جه الناس شدوها من تحتهم فوقعوا ع الأرض.. تات تراراران تن تن.
مرة بعد ما شالوا مرسى الإخوان قالوا ده انقلاب ولفوا العالم كله عشان يقنعوهم بكده ورجعوا قفاهم يقمر عيش.. تات تراراران تن تن.
مرة بعد الإخوان ما مشيوا جابوا رئيس مؤقت وحكومة مؤقتة ولسه النور بيقطع والسلع بتغلى وكل حاجة زى ما هى، وكل ما تسأل بيقولولك اصبر دى فترة مؤقتة.
مرة واحد قرا الحاجات دى كلها ومضحكش، وده بالذات بقوله: مش لازم تضحك، لسه جايلك حاجات قدها 100 مرة وهتضحك يعنى تضحك، هتروح مننا فين.. تات تراراران تن تن.