رصد الكاتب الصحفى مؤمن المحمدى تاريخ السنوات العجاف بنادى الزمالك، من خلال رحلته فى مواجهة النادى الأهلى، حيث كتب على صفحته الشخصية بموقع التواصل الاجتماعى "فيس بوك" على سبيل الدعابة: "حيث بدأ كلامه بالدعاء "يا رب الزمالك يكسب، علشان أصحابى الزملكاوية اللى أعصابهم تعبانة.
وقام المحمدى بإحصاء عدد السنوات التى فاز فيها النادى الأهلى على الزمالك، ويقول "وبعدين مش عدل يعنى بقالنا 17 لقاء ما خسرناش منهم، على مدار سبع سنين وتلات شهور فى أربع بطولات مختلفة".
ثم يستعرض المحمدى الحالات التى يفوز بها النادى الأهلى، ويقول إنه يفوز فى جميع الحالات، سواء بحكام مصريين وأجانب، بجمهور وبدون، فى القاهرة أو خارج القاهرة، بأقدام لاعبينا ولاعبيهم، بجوزيه ومساعد جوزيه ومساعد مساعد جوزيه لحد محمد يوسف، وبعدين المرحوم فتحى مبروك، وهم بهنرى ميشيل وكرول، وهولمان، وأحمد رفعت، ودى كاستال، وحسام حسن، وفييرا وحلمى طولان وميدو، وإحنا كويسين، وإحنا تعبانين، وإحنا منهارين وإحنا ميتين، وإحنا بـنلعب كاملين، وإحنا عشرة لاعبين، فى عهد مبارك والمجلس العسكرى ومرسى وعدلى منصور والسيسى، سواء إحنا اللى اتقدمنا فى بداية الماتش أو هم".
ويعبر عن تأثره الشديد بعدم مشاهدة أجيال ومشجعى الزمالك وهو يفوز على النادى الأهلى، فيقول "أجيال كاملة اعتزلت، واللى جم بعدهم قربوا يعتزلوا، يا راجل، ده رجالة بشنبات، وبنات قمرات قربوا يبقوا ستات، ما شافوش الزمالك بـ يفوز علينا".
ويختم المحمدى كلامه بالدعاء لنادى الزمالك قائلاً "يا رب، اجبر بخاطرهم، إنت اللى عالم بحالهم، آمين يا رب العالمين".
تم أضافة تعليقك سوف يظهر بعد المراجعة