خالد عبد العظيم أحمد يكتب: صورة بلا ملامح

عشــقـت الحـــب عـلى إيدك
ومـــــــــش دااااارى
وعيشتى فى قلــبى وفى عقـلى
فى ليـلى قبـل نهارى
بحبـك بس مش شايفـك
راسمــلك صـورة ف خيـالى
أشــيل الصــــورة فــى قلـــبى ..
وألــونها بأفــكارى
بحب السمرا أخلـيها
جمـيلة وسمـــرا فى سمارى
وأحـب البيـضا أخلـــيها
شمس مـنـــورة نــهارى
.........................
راسملك صــورة يا حبيـبتى
فى كل ركن مـن دارى
وليه ما ارسمى وأنا شايفك
وردة فى وسـط أزهارى
وليه ما اكتبشى وأنا سامعك
ضحكة ف بحر أحزانى
وليه ما احلــمشى وأنــا حسّك
فرحة بتسعد أيامى
عشقت حلمت رسمت كتبت
على إيدك بقيت غاوى

سهرت تعبت حـزنت ضحكت
بقيت القصة والراوى
..........................
ونمـت ف ليـلة من تعبـى
ما بين قصصى وأشعـارى
لقيتنى ف حلم مـش حابه
بكسّر صورى وألوانى
لقيتنى فى بحر وفى مركب
لا لاقى شط ولا صارى
تايه وحيد فى بحر غريق
شـايل صورة فى أحضانى
صحيت مفزوع على حقيقة
مجتش فى يوم على بالى
لقيت الصورة مكسورة
ولقيت الأصل مش دااارى