خالد عبد العظيم أحمد يكتب: ثمن الحرية

اتخنقتى لما عليكى غيرت؟
لما شفتك وأنتى خارجة واتضايقت؟؟
غطى شعرك دارى صدرك
إوعى حد يشم ريحتك
أو يقرب حتى منك
إوعى ف الشارع يعلا صوتك
أو بحسن نية تبصى
تسحرى الدنيا بعيونك
إن حد سألك
مترديش
وإن حد عاكسك
متبصيش
ومن الآخر لو تريحينى
ماااااااا تخرجيش
ما أنا أصلى مجنون بعشقك
وغيرتى عليكى بتقتلنى
عايز كلامك
همسة شفايفك
نظرة عيونك
ليا وملكى
حتى رموشك
جدايل شعرك
ضحكة خدودك
يعيشوا بأمرى
حتى أن حلمتى فى منامك
أكون أنا فارس أحلامك
وإن يوم غلطتى وحلمتى بغيرى
هحرررم عليكى النوم يا حبيبتى
صعب حبى ؟
مجنونة غيرتى؟؟
طيب قوليلى
مين فينا عيشته ليها طعم؟
من غير حبيب يغير عليه؟
من نبض قلبه يحس بيه
من غير كلامه
يفهم كلامه
اتخنقتى لما عليكى غيرت؟
طيب مابلاه الحب وغيرته
لو كنت بغيرتى أنا خنقتك
وعيشى يا حبيبتى أيامك
من غير غيرتى وبراحتك
ونامى وشوفى أحلامك
ومن غير خوف
ولا هتلاقينى قدامك
واخرجى وحدك زى ماكنتى
وشيلى صورتى من قلبك
يمكن هيا كمان بتراقبك!!
حلوة الحرية يا حبيبتى؟
عيشيها ومن قلبك
وفكى حبالى من إيدك
أنا لا عمرى طلبت ولا اتمنيت
تكونى عبدة وأنا سيدك
أنا بس فرحت وحبيتك
واتمنيتك
واترجيتك
أكون النبض فى وريدك
أكون نفسك وتنهيدك
أكون فرحك فى يوم عيدك
اتمنيتك واتمنيت
تكونى النور فى لياليا
تكونى الضحكة
فى وقت الضحكة ما تغلا عليا
ويااااما حلمت واتمنيت
تكونى ليا لوحديا
لكن إنتى !!!
لكن إنتى اخترتى الحرية
بس ياريتك تقوليلى
حلوة الحرية من غيرى؟