عصام السيد يكتب: فقه الخوارج الجدد

روى أحدهما فى صحيحه
الدم المصرى هـ نبيحه
وهـ ندبح كل يوم عصفور
ولو لسه عياله صغار
فى قلب العشة بيصيحوا
وقال آخر محتدًا فى إسناده
عِيَالكُم اللى دخلوا الجيش
أدى دقنى أن عادوا
وأشار كبيرهم فى التفسير
سنحكمها يا أما نفير
فرد الجمع فـ بلاهة
لك السمع لك الطاعة
لك السمع لك الطاعة
وزادت لهجة التهديد
مابين أصحاح وبين أسانيد
وأنا قاعد وبتفرج
وحاطت راسى بين كفى
كأنى فى دنيا غير دنيا
وبستدعى قصاد عينى
أيام ما كنا بنغنى
ناح النواح والنواحة
ناح النواح والنواحة
مش دول يا نجم ولاد حاحا
مش دول يا نجم ولاد حاحا
دول شقوا الصف وكسرونا
وتاريخهم خسة وبجاحة
إما إحنا يا نجم ولاد حاحا
عارفين إزاى نحمى البقرة
مهما انقهرت مهما نصهرت
راح ترجع سمره ونطاحه
راح ترجع سمره ونطاحه