مونيكا ناجى تكتب: دعوة للتفاؤل

- أحياناً بيكون فيه جانب مظلم بس دايماً بيكون فيه جانب مضى
- كتير بيبقى فى وقت صعب بس دايماً هيكون فيه درس بتتعلمه او حاجة بتكتشفها
- يمكن تكون وقعت كتير بس افتكر دايماً انك كنت بتقوم
- مهما كانت الدنيا ضلمة والكهرباء قاطعة هى كلها كام ساعة ونور الشمس بيطلع
- مش هتفضل طول عمرك جوه الصندوق الضيق لا هيجى يوم وهتقدر تطلع وتطير كمان
- يمكن فى وقت بتكون وحيد مش لاقى سند او منفذ هواء بس انت ساعتها بتكون اقوى واحد فى الدنيا لانك بتقف بنفسك وانت بنفسك اللى بتفتح منفذ ليك
- الحاجات اللى خسرتها امبارح كانت كوبرى وصلك لكل اللى انت فيه النهاردة
- عمر ما كان اللى مترتبلك وحش بس اكيد مش هتاخد جائزة من غير ما تتعبلها وعلى قد تعبك على قد ما هتبقى جائزتك
- مش هتحس بحلاوة الطعم الحلو الا لو ذوقت المر
- اه صحيح أن الدنيا خرم ابرة بس فى الناحية اللى هتطلع منها هتلاقيها واسعة و عينيك مش هتجيب آخرها
- ساعات تحس انك مخنوق ومش قادر تاخد نفسك بس مش يمكن ده علشان تحس بقيمة النفس اللى بتتنفسه
- دموعك دى لما نزلت علمتك أن فى حاجات مكنش لازم تمسك فيها بزيادة
- كل ما تحس أن ناقصك حاجة لو دورت هتلاقى عندك حتة زيادة او عندك فى حتة معينة كم كبير اوى
- لو حسيت أن الناس مش كلها بتحبك متزعلش انت قادر تحبهم وده كفاية

- الدنيا مش سودة أو بيضاء الدنيا مخططة وده اللى خلاها جميلة
- كل امنياتك اللى متحققتش عادى أنت دلوقت أحسن من غيرها علشان عرفت تحقق حاجات تانية
- مش علشان فى حد عنده موهبة واضحة يبقى أنت معندكش لا كل واحد عنده موهبة ده حتى ضحكتك دى موهبة تقدر تلمس بيها قلوب الناس
- ممكن يكون فيك حاجة مميزة مش متحددة هى ايه بس كفاية أن كل اللى بيتعرف عليك بيحس بتميزك ده
- كل واحد مشى من حياتك علشان حاجة من الاتنين يا يعلمك تحب اللى حواليك قد متقدر يا يعلمك قيمة اللى هيجوا بعديه
- اوعى تزعل انك وقعت ما يمكن يكون فى حاجة مهمة كان لازم توطى تجيبها
- خلى بالك الافكار التشاؤمية كتيرة اوى ورغم انها بتلمس وجعك بس مش مميزة زى الافكار المبهجة اللى بتغير من حالة لحالة
- متزعلش لو المحطة فاتتك يمكن مش هى دى محطتك اللى مكتوبالك
- اه الفرح وقته قليل بس الحاجة اللى موجود منها كتير زيادة ملهاش قيمة
- متضايقش لما تعمل حاجة مش عجباك يمكن تحبها بعدين ويمكن تعلمك حاجة بس خليك متأكد انك عالطريق الصح وده اهم
- اصحى وخلى بالك انك مش ضامن بكره فافرح باللى موجود النهاردة واعمل خير على قد ماتقدر
- مش كل وردة جميلة ريحتها حلوة فمتركزش عالسطحيات المهم انت من جوه ازاى
- اوعى تكون فاكر انك ناقص من غير حاجة معينة او من غير شخص معين
- متفتكرش أن الحزن اللى موجود مش هيعدى او يخلص مش واخد بالك انك زمان كنت فاكر كده وعدى.
- متخليش حاجة او شخص يوقفك عن حلم او هدف انت مقتنع بيه لانك لو مش مقتنع ومؤمن بيه عمره ما هيشوف النور.