حالة من الرعب والفزع انتابت المجتمع المصرى من ساسه لراسه بعد أن أعلن تنظيم البلالين الشهير بحركة 6 إبريل أو 6 إبليس عزمه على تنظيم فعاليات كبرى فى الذكرى الأولى لتنصيب الرئيس عبد الفتاح السيسى، فقد أعلنت قيادة التنظيم وأعضاؤه الخمستاشر عن استراتيجية- خلوا بالكم من كلمة استراتيجية-لتعميم الإضراب عن العمل 11 يونيو ودعوة المواطنين لمنع سداد الفواتير أو الضرائب وغيرها من الحركات الجامدة التى يمكن أن تهز استقرار النظام.
أمامير تنظيم البلالين النشطون على «فيس بوك» وعلى قنوات الإخوان الإرهابية قالوا إن استراتيجيتهم تعتمد على توزيع البيانات السياسية الحادة جدا والغاضبة خالص على المواطنين فى بعض المناطق الجغرافية فى القاهرة والمحافظات، وإن كل عضو من الأمامير الخمستاشر فى الحركة سيغطى منطقتين بكاملهما أو شارعين رئيسيين فى القاهرة الكبرى أو شمال الصعيد بالبيانات المطبوعة لونين والمزينة بقبضة الهلالى السوداء، وسيكون مع كل عضو واحد أو واحدة قريبته عشان تصوره وهو واقف بالشورت فى عز الحر بيترجى المواطنين عشان يشاركوا فى الإضراب، وبعدين تتجمع الفيديوهات والصور وتترفع على صفحة التنظيم الأم على الفيس لإثبات حالة.
وأعلن الأمامير فى التنظيم أنهم عائدون وبقوة للعمل من جديد على تثوير المجتمع، لأن التثوير الأولانى كان فيه عيب ومنجحش أوى فى تنفيذ المطلوب، ويناشد أمامير التنظيم المواطنين سرعة الاستجابة ولو حتى رمزيا بالمشاركة فى الإضراب أو حتى التصوير فيديو مع أعضاء التنظيم الخمستاشر، حتى يتم إنجاز مقطوعة الفيديو بلقطات حية ومعبرة لضمان استمرار السبوبة اللى فاتحة بيوت كتير.
أمامير التنظيم ناشدوا المواطنين أن يجربوهم المرة دى ويتصوروا معاهم، ووعدوا فى المرات الجاية بتقديم هدايا عينية وألعاب للأطفال وتاتوهات للبنات ودباديب حمرا للمخطوبين عند دعوتهم للإضراب أو تنظيم وقفة بالباروكات الملونة فى شارع جامعة الدول العربية، كما ناشد الأمامير المواطنين الشرفاء ألا يستخدموا العصيان والنبابيت والضرب بالشلاليت ضد أعضاء التنظيم حال رفض التصوير والإذاعة، وإن اللى مش عاجبه أساليب الحركة يقول والنبى الخمستاشر دول يعملوا إيه عشان تستمر السبوبة اللى فاتحة بيوت ناس، محدش بياكلها بالساهل والله وعلى رأى المثل «إيه اللى رماك ع الحركة قالك اللى أمر منها».
