محلات الفول وأجمد سحور فى مصر.. وإن خلص الفول أنا مش مسئول

عادى جدا أنك تروح وتيجى وتحس إنك لسه عايز تاكل تانى، وده لأن وجبة الفول التى تشتهر بها محلات كثيرة فى مصر، ومنها بيتحول زى الإدمان فى جسم كل اللى ياكله ويجربه من أول مرة، السحور المتميز في هذه المحلات ومعظمها له تاريخ طويل فى تقديم الفول، والخلطة المظبوطة تخليك تيجى 30 مرة فى 30 يوما من رمضان من غير ما تفكر حتى فى تغيير المحل الذى تعودت عليه فى غير أيام رمضان.

المحلات المتخصصة فى تقديم الفول بجميع أنواعه أصبحت للأكيلة الصح، والتى تبدأ بالعيش البلدى وريحة الطعمية ممكن تجيبك من على أول الشارع، أما بقى فى رمضان فالوضع بيبقى أحلى بمراحل، وده لأن السحور فى الهواء الطلق سواء أمام المحلات المشهورة أو على ترابيزات متراصة بجوارها، ورغم الزحام على كل هذه المحلات فإن الأكل بينزل طازة بطازة بس ده إن عرفت توصله أصلا، خصوصاً أن زحمة اللى عايزين يتسحروا فى نفس الوقت هتخليك تفتكر أنهم بيوزعوا الأكل ببلاش وده مش صح طبعاً.

أسعار وجبات السحور معقولة فى جميع المحلات ويمكن اصطحاب العيلة كلها لتناول السحور خارج المنزل بتكلفة مناسبة، وبالمرور على عدة محلات مشهورة بتقديم السحور وجدنا أن وجبة السحور المتينة بتبدأ من 10 - 15 جنيها للفرد، أما البقشيش فأنت ومزاجك، وممكن كمان تاكل فى عربيتك وأنت راكنها، وده غالباً اللى هيحصل لأن صعب جدا تلاقى ترابيزة تقعد عليها هناك بعد الساعة 12.

من أهم المطاعم التى تقدم السحور هو عم بشندى وأهم طبق مميز عنده بعد الفول طبعا طبق البيض الأومليت اللى بيعمله بخلطة جامدة جدا من الموتزريلا والزيتون والفلفل ومكونات كثيرة بتخليه يفتح نفسك على الأكل، والفول بيتقدم مضروبا مع الطحينة والخلطة ولو حتطلبه فى ساندوتشات بيجى فى عيش بلدى نصين مع السلطة والحبشتكنات كلها، ومن الآخر كدة هو ده أجمد طلب بيطلبوه الأكيلة فى السحور .

نصيحة لكل الناس اللى قررت تتسحر فى أشهر محلات الفول فى مصر أنها تبدأ رحلة السحور من الساعة الواحدة بعد منتصف الليل على الأقل لأن جميع المحلات بتكون زحمة جدا، وطول ما أنت قادر تيجى ومتطلبش ديلفرى يكون أحسن، عشان الأكل بيبقى طازة وسخن أكثر، أما بقى لو نفسك فى المسقعة والبابا غنوج فحاسب جدا من طلبهم سبايسى لأن جميع المحلات المشهورة فى الحراق مبيهزرش.

آخر نصيحة ليك، لو هتتسحر فى واحد من هذه المطاعم أمن نفسك من الحموضة بحاجة ساقعة ومية كتير، وهات معاك أصحابك وعائلتك لأن مهما كان الأكل حلو اللمة هى اللى بتخلى الطعم أحلى.