شارك الشاعر، حنا النجار، خدمة "صحافة المواطن" بقصيدته "قصيدة الشهيد"، والتى كتبها رثاء لشهداء القوات المسلحة فى العريش.
نص القصيدة:
الشهيد اللى بقيت آلامه وجروحه بتزيد
لحد ما بقى اسمه شهيد
12 شهيد ف العريش
راحو ضحية علشان إحنا نقدر نعيش
كان حامل سلاحه فوقيه
وموصى ربه إنه يرجعه لأمه ويحميه
كان وردة جميلة وسط شوك إرهاب
مات ومن بعده البيت بقى مفهوش أحباب
أصل إلى خطوة رجليه كانت محليه المكان غاب
غاب من غير أسباب
ايه جرالك ياخى غبت وقولت عدولى
ياك إنت صدقت إنك موت وبتقولنا ادعولى
ياخويا كفياك غيبه دى أمك مجهزالك سريرك ومطرحك متزعلهاش وتخليها تطلع منها العيبة
ياشهيد والله القلم حاسه بيكتب بدل الحبر دم
أقول إيه بس لامك وأبوك
أقول إيه للى ربوك
دولا ياخى كانوا ناويين حتى يجوزوك
طيب أقوللهم ايه اقوللهم أن انهارده الـ3 بتاعك علشان يجو يزوروك
والله مهينسووك...
حرام عليك ياخى ده فراقك تعب قلب ابوك
طيب ياخويا قولى ارجوك ورد عليا وقتيها كنت جعان ولا عطشان
طيب قولى وقتيها كنت بتفكر ف ايه كنت بتفكر تجيبلها الفستان
ولا كنت حاسس أن عروستك هى الجنه وكنت فرحان
أنا عارف انك كنت زعلان علشان ف اليوم ده متصلناش بيك
مقدرش اقولك ياشهيد أن قلب امك كان حاسس وكانت بتبكى عليك
كنت نازل بعد ساعتين
وامك كانت مجهزالك الاكل يا ضى العين
اقوللها ايه اقوللها نزلى الاكل للمعزيين
للى جاين يعزو ف ضى العين
يرضى مين ياناس دى رجليه اتقطعت وبقيت تراب
اقول ايه لابوك اقوله جبتلك الغالى ف مقطف كانه شويه تراب
آآآه ع قلب ابوك وامك إلى ماهيروح منه العزاب ودمع العين
اللى ماهيروح ولا بعد سنيين
الشكوة والقضية لله
واهو الشهيد عنده وقاعد ويااه
روح ى شهيد وسلام ع روحك الطاهرة
روح ياشهيد للى خالقك وهتفضل ف قلوبنا مهما تغيب انت الشهيد والاخ والحبيب
رحم الله كل شهداء الوطن
شاركونا فى تحرير المواد الصحفية بإرسال الصور والفيديوهات والأخبار الموثقة لنشرها بالموقع والجريدة المطبوعة، عبر خدمة "واتسآب اليوم السابع" برقم 01280003799، أو عبر البريد الإلكترونى send@youm7.com، أو عبر رسائل "فيسبوك"، على أن تُنْشَر الأخبار المُصَوَّرَة والفيديوهات باسم القُرّاء.
