بتحبينى
أنا مش عايزك تحبينى
ما أنا عشت عمرى عشانك
أحب نيلك وأعشق ترابك
وانت لما اخترتى
اخترتى من الماضى
وأنا المستقبل رفضتينى
ولما فى صرختى عاتبتك
فى حبى طعنتينى
وكأنى مكنتش عايش عشانك
وكأنك مكنتيش تعرفينى
يبقى ايه لازمته دلوقتى أحبك
وايه فايدة انك تحبينى
أنا هفضل على فكره أحبك
ومش عايزك تحبينى
بس ياريت حبى صغارك
هما ليكى
هما فيكى
هما منك
هما عارك
تحت الكبارى هتلاقيهم
الدنيا برد فى الشتاء
خافى عليهم
محتاجين هما لحضنك
فى حضنك يا بهية
يا ريت تضميهم
خسرو فى الشارع كتير
ومحتاجين منك عوض
عن عذابهم عوضيهم
وأبقى اسرقيلهم من اللصوص
كسرة وحبة غموس
يمكن تلميهم
هتلاقى الألم ساكن الضلوع
ساكن القلوب
ياريت تعالجيهم
ومفيش مدارس فى الشوارع
بالمرة علميهم
بيحبوكى هما
يا ريت انت
يا بهية تحبيهم
أما أنا و إللى زيى
عادى هنتحمل
ومهما طريقنا بينا يطول
عشان خاطرك
يا بهيه هنكمل
ما احنا إللى عشنا نحلم بيكى
عروسة فى ليلة العرس تتجمل
وعشان خاطر حلمنا
نصبر وتتحمل
لكن هما
هما حرام يا بهية
أطفال وتتألم
والا انت لسه
يا بهية زى ما انت
بتحبى إللى يسكت
وتزعلى من إللى يتكلم
أنا بس بصراحة بقولهالك
وانت يا ريت تسمعينى
وأنا هفضل على فكرة أحبك
ومش عايزك تحبينى..
تم أضافة تعليقك سوف يظهر بعد المراجعة