إيناس عز الدين متضامنة مع تامر حسنى: "مش عيب تبدأ من الصفر وكلنا فينا بلاوى"

تضامنت المطربة إيناس عز الدين، مع الفنان تامر حسنى، بعد الهجوم الساخر عليه، عقب نشره صورة قديمة له خلال فترة المراهقة مقلدا المشاهير، مؤكدة أنه من العيب النظر لعيوب الناس وترك عيوبهم.

وكتبت إيناس عبر حسابها على فيس بوك: "عمر ما كان عيب إن الإنسان يطور نفسه ويحسن من نفسه ومن عيوبه، محدش خالى من العيوب وكلنا فينا بلاوى ما يعلم بيها إلا ربنا، وبنحسن من نفسنا سواء معانا فلوس أو لأ، الناس اللى بتقول ان الفلوس كل حاجة ياما بنشوف ناس معاهم فلوس لكن لا بيعرفوا يلبسوا ولا بيبان عليهم وناس على قد حالهم لكن مهندمين فى نفسهم وتشوفهم تقول فى بؤهم معلقة دهب"

وتابعت إيناس: "مش عيب تبدأ من الصفر وتوصل لمركز مهم وتهتم بنفسك، لكن العيب انك ما تشوفش عيوب نفسك وتشغل بالك بعيوب الناس وتتريق عليهم، فى النهاية شوف انت فين واللى بيتريق عليه بقى فين، يمكن تفهم ساعتها ان التريقة على مخاليق ربنا مش هتخليك أحسن أو أنجح منهم".