يخرب مطنك يا جــــدع
إزاى بتضحك ف الوجع
وتقـول ما فيش
رغم الجـروح دى كلها
وظروفك اللى ف شكلها
قـادر تعيــــش
إزاى بتعرف من سكات
تكتم مشاعرك ف اللى فات
وبرغم كل المجــريات
مابتشتكيش
إزاى ف وقت المشكلة
بتبقى باصص للسما
زى النخــيل وسط الخــلا
ما بتنحــنيـش
إزاى بتسكن ف القـبــور
ومقضى عيشتك بالطابور
وف عـز لخبطة الأمـور
مابتعـاديـش
إزاى بتقـدر ف الـبـلاوى
تقول نكـت وتقول غناوى
والكلمة لو موتك تسـاوى
مابتتنيـــــــش
إزاى بتعرف ف الجــراح
تجيب من الضيق البـراح
وبطـيبــة وبـكل ارتيـــاح
ما بتعانيش
إزاى بتفــرح ف الهمــوم
ووسط القلق بتلاقى نــوم
والحـلم جــواك كل يــــوم
مابينتهيــــش
