أنت اتعلم عليك
الفنان العالمى براين آدمز جه مصر عشان يعمل حفلة، وصور كلاب الشوارع عند الأهرامات والموظفين كتبوا له رقم صادر ووارد على الجيتار أبو ملايين كأنه شوال بطاطس، فزعل. احمد ربنا يا آدمز، أنها جات على كده، الجيتارات بتروح وتيجى.
التسديد بالنيات
بعدما أعلن رجل الأعمال الهارب حسين سالم تسديده 5 مليارات جنيه لمصر من أجل «التسوية والرجوع»، تراجع ونفى وقال إنه لم يسدد ولكن «لديه نية للدفع».
ولا يهمك يا كبير.. مادام النية سليمة إحنا واثقين فيك.
صبح على مصر يا دكتور
قرر وزراء الخارجية العرب، منح الدكتور نبيل العربى مكافاة مالية قدرها 2 مليون دولار؛ تقديرا لجهوده أثناء توليه منصب الأمين العام للجامعة.. وهى بالمناسبة أسوأ 5 سنوات على العرب فى التاريخ الحديث.
المهم، هتصبح على مصر بكام يا دكتور؟!
