هل تصلح الدولة للكورة.. ولاّ.. تسيبها لـ اللى يقبض «الجمعية»؟

لا يعنينى.. ويا رب لا تهتموا أنتم أيضاً بما دار، أو حدث خلال جمعية الأندية صاحبة الأصوات فى انتخابات اتحاد الكرة.. لأنها مجرد جلسات للاتفاق على تبادل المنافع والمصالح.. وحضراتكم هاتشوفوا بنفسكم!

• يا سادة.. فى مصر.. ما يعنينا الآن أن نجد الدولة على أهبة الاستعداد للمطالبة بكرة قدم محترفة.. فيها حاجة دى؟!

يعنى لعبة تشبه نفس اللعبة التى نراها فى ملاعب العالم، وشبه كبير منها فى الخليج العربى!
الكرة المحترفة لن تكون إلا بإرادة الدولة.. سواء للحفاظ على شكل مصر، أو لأن الاحتراف يعنى دخلاً كبيراً، وفرصاً للعمل، بل عملة صعبة.. آى والله كده؟!
• يا سادة.. فى مصر.. الدولة لو أرادت ستتقدم بإبلاغ الاتحاد الدولى عن هؤلاء الهواة، الذين يتمسكون بإدارة صناعة محترفة خالص، هى كرة القدم!
نعم.. ستقول للفيفا: لدينا دورى مجموعات مع أنه يجب أن يكون بنفس عدد الأندية فى الممتاز يعنى «18» ناديا.. مش 5 مجموعات فى 18؟!
كمان الدولة هاتقول للفيفا.. عندنا أندية بدون جماهير!
وتسأل.. هى هاتبيع تذاكر وتذكارات لمين؟!
بلاها المبيعات.. ومين جمهورها.. مين هايدفع كام فى بثها التليفزيونى؟!
• يا سادة.. فى مصر.. الدولة لازم تقول للفيفا إن الصوت فى الجبلاية = اشتراك فى الدور 132 للكأس بـ4 آلاف جنيه.. وكام فريق ناشئين يتم إعطاؤهم سماسرة.. وآهه النادى صاحب الاسم ياخد 40 ألف معونة من مال الشعب كمان!

عندك يا فيفا هانم كمان فى مصر لاعبين مجندين وطلبة.. ومدربين نص يوم لديهم تفرغ من أعمال وظيفية أخرى.. والله يا باشا؟!

• يا سادة.. فى مصر.. قولوا.. معايا للدولة تبلغ الفيفا إن فيه دوريات بدون ملاعب.. ومناطق بدون أندية.. كله.. كله.. على الورق!

يا دولة باشا.. حددى طلباتك فى الشكوى للفيفا واحصريها فى طلب لجنة «محايدة».. تراقب ما يحدث!
بلاها لجنة.. حضراتكم احكموا قبضتكم وشوفوا.. الملاعب المؤجرة.. وغيرها.. وغيرها.. وخير الكورة يروح إما لفشلة أو فسدة!

• يا سادة.. فى مصر.. لازم يكون فيه معايير دولتنا تطالب بيها.. أولها وآخرها الآتى: ليه مافيش ترجمة لأوراق اتحاد أوروبى يخلى منها المراهنات وإعلانات الخمور وما هو ضد عقائدنا وتقاليدنا.. والباقى تنفيذه ملزم؟!

طيب.. لو مش عارفين.. ليه يا دولة باشا ماتطلبيش «بيت خبرة».. يقدم هذه الخدمة.. عادى جداً!
عارفين ساعتها هانغير كل ده.. ويكون عندنا مسابقات وجماهير وكورة تشرف ونروح كأس العالم.. عادى!

• يا سادة.. فى مصر.. كما سنجد والعياذ بالله استثمارات «B-O-T».. لبناء ملاعب رائعة ومبيعات كبرى.. بل ستصل فرق أوروبا لإقامة معسكرات كروية شتوية وصيفية فى كل مناطقنا الخلابة!
ده حضرتك.. ممكن نسميه: «نشاط سياحى».. قد يخرج السياحة العامة من كبوتها!
مش كده وبس لسه كتير.. وكتير.. تخيلوا لو أصبحت قطاعات الناشئين للتفريخ.. كما ستدفع الأندية للشراء؟!

• يا سادة.. فى مصر.. ادعوا معى أن الدولة تصحى وتمتلك إرادة كى يصبح لدينا سلعة للتصدير اسمها لاعب الكرة.. وتزيد الأعداد زى أبوصلاح والننى وكوكا.. ووردة.. وأحمد المحمدى! ياااه.. شوفى يا ست دولة.. تحويلات العملة للرجالة دى هاتكون أد إيه؟!

تخيلوا.. 50 لاعب زى صلاح يكفوا مصر تحويلات لـ4 شهور.. ولاّ ده حلم صعب؟! والله أبداً.. سهل جداً!