إحنا ما بنتهددش

إحنا ما بنتهددش

وزير الخارجية الإيطالى باولو جنتيلونى قال إن بلده هتتخذ إجراءات فورية ومتناسبة ضد مصر عشان قتل جوليو رجينى، براحتك، إحنا ما بنخافش، ده إحنا 7 آلاف سنة حضارة، هنخاف منك أنت؟.. اعمل اللى تعمله، مصر مش مهمة، المهم الباشا المباحث.

فاسد بس محترم

رئيس حكومة أيسلندا اسمه ديفيد سيجموندور جونلوجسون، استقال من منصبه لأنه فاسد، وورد اسمه فى فضيحة وثائق بنما، وهذا هو الفارق بين فاسد محترم خواجة، وبين فاسد محلى مهما ورد اسمه فى فضائح وفساد صهين وكابر واستمر فى منصبه وعمل من «بنما».

شكراً جابر نصار

شكراً للدكتور جابر نصار رئيس جامعة القاهرة على قراره بإقالة الدكتور حسام قنديل، رئيس قسم جراحات القلب بطب قصر العينى، بسبب تصريحه «القصر العينى مليان حرامية».. فهذا القرار الصائب سيردع كل من تسول له نفسه اتهام خلق الله الحرامية بالسرقة.