ووسط الضغوط الكبيرة خاصة على العروسان، ومطالبة الأهل لهما بأن يتخذا قرارًا مصيريًا فى عدة لحظات، وأن يستكشف كل منهما شخصية الآخر من خلال عدة أسئلة.
وربما يبرر هذا الكثير من الأسئلة الغريبة وغير المنطقية التى سمعتها الفتيات من "عريس الغفلة" فى
جلسة "صالوناتى".
هذه الأسئلة التى كشفتها الفتيات فى إجابة على سؤال "إيه أغرب سؤال سمعتيه من عريس؟" ربما تجعلك تشعر أن مشاهد زيجات الصالونات فى الأفلام العربية بعيدة تمامًا عن المبالغة..
"فكرى ثوانى.. تكسبى عريس"
من الطبيعى والمنطقى أن يطرح العريس سؤالاً عن الشخصية مهما كان غريبًا، لكن الغريب أن يطرح سؤالاً أشبه بتلك الأسئلة التى تطرحها برامج المسابقات، فقالت "مريم" "سألنى انتى تعرفى ليه سموا قناة السويس كده؟ قلت له عشان السفن بتعدى فيها بسويس بسويييس، ماما اديتنى بالكوع ماعرفش ليه".
أما "أحمد" فحكى "بنت اعرفها العريس اللى اتقدملها قالها تعرفى عدد نظريات فيثاغورس ؟ و هى كانت أدبى اصلا، بس هى قالتله أنا اعرف مكتبة اسمها فيثاغورس و المقابلة انتهت كده".
"غبى منه فيه"
الأسئلة الأغرب كانت عن الحالة الاجتماعية للعروس، حيث كتبت فتاة "كنت لابسة خاتم فضة راح بص عليه وقالى إيه ده انتى مخطوبه قلت له لا متجوزة وقلت اجدد"، وهو السؤال الذى لا يقل غرابة عن ذلك الذى كان من نصيب "ندى" "أغرب عريس سألنى سؤال هو انتى بتفكرى فى الجواز ؟ بصراحة فضلت ساكتة لحد ما جه يمشي، سلمت عليه وقلت له انا كنت بفكر فى الجواز بس بصراحه اول لما شوفتك كرهت الجواز ومبقتش افكر.. يومها اتهزأت من أمى بس حسيت إنى اخدت حقى".
"خلى خيالك واسع"
أما "روضة" فأجابت على السؤال "هو مش سؤال على قد ما هى قائمة أسئلة مبنية على التخيلات، لو رجعت البيت مصدع و الولاد عاملين قلق هتتصرفى ازاى ؟ وأنا اللى طلع عليا ولاد مين و ضحك بقى و كل الأسئله على نفس النمط وأنا واخدة الحوار كله بتهييس.. بس كان شخص محترم بجد و بحترمه جدا مع إنى و ربنا ما فاكرة اسمه".
أما شروق فقالت "سألنى لو عندك شنطة واتقطعت تخيطيها ولا ترميها وتشترى غيرها ؟".
"المحقق"
نوع آخر من الأسئلة الغريبة كان من نصيب "سامية" التى قالت "سألنى طالما مش بتشربى سجاير ولا بتشيشى ولا بتسكرى ومش عندك عربيه و مش شايله فلوس فالبنك فبتودى مرتبك فين؟؟؟"، أما "فاطمة" فسألها "أنا جاى لبشمهندسه فاطمة و انتى مقولتيش انك مهندسة متأكده انك هى ؟؟".
"بتعرفى تربى كلاب؟"
بصراحة صدم أحد العرسان "ندى" بسؤال "بتعرفى تربى كلاب ؟ أصل أنا محتاج حد يهتم بالكلب بتاعى وانا مش موجود.. قلت له اه انا ممكن اربى حضرتك حالاً".
"الملافظ سعد يا عبعال..."
مزيج من عدم الكياسة والوقاحة واجهته "غادة" بسؤال عريس "قالى انتى طول عمرك تخينه ولا حصلك حاجه تخنتك (...) شربت هوا مثلاً؟"، كذلك نور التى قالت "سألنى انتى ليه محللتيش احسن يكون عندك كانسر زى مامتك.. كان أحقر سؤال".
"الفيلسوف.."
السؤال الأخير كان من نصيب "دعاء" التى قالت "سألنى شايفة نفسك فين بعد 5 سنين؟ قلت له مش فى مصر ومش متجوزاك".
موضوعات متعلقة..
من الإحراج لكسر القلة.. معايشة تخيلية لأفكار العريس المصرى فى صالون العروسة
الشباب والفتيات يحكون عن أغرب مواقف "جواز الصالونات" على "تويتر"
