"بتفطر ايه أول يوم رمضان"..البط والمحشى سيستم أكلات المصريين فى أول فطار

"مدفع الإفطار اضرب" ذلك الجملة التى تأتى بعد ظمأ طال لساعات وجوع طال للساعات ذاتها، الجملة التى ينتظرها الصائمون، ويكون لسماعها على الأذن وقع خاص، خاصة فى أول أيام الصيام التى يكون لها تأثير مختلف عن باقى أيام الصيام، فهى بداية الاحتفال بشهر رمضان، و بداية الصيام الذى كثيراً ما يشهد معاناة، توقفها الجملة السابق ذكرها، ولأن أول يوم رمضان هو يوم الولائم والعزائم والاحتفال يخصص له المصريون أكلات تكون رئيسية على مائدة الإفطار، وفى الغالب تنحصر أكلات الإفطار فى أول يوم رمضان فى عدد محدود من الأصناف.

ومع اقتراب أول أيام الشهر الكريم شارك اليوم السابع المصريين فرحتهم بشهر رمضان وسألهم "ايه هى أكلات فطار أول يوم رمضان؟"

البط والمحشى

وقالت رانيا مصطفى 26 سنة "الأساسى على الفطار فى أول يوم رمضان هو البط و الكشك، وممكن معاه محشى أو مكرونة بالبشاميل، ساعات نغير نعمل ديك رومى لكن دايماً البط بيبقى الأساس"، وقالت أمنية أحمد "فطار أول يوم رمضان بيبقى ليه طقوس خاصة، لكن الأكلات الأساسية فى أول يوم هى البط ومحشى ورق العنب، وبعدين بقى ممكن يتعمل معاه أى حاجة تانية".

الديك الرومى

أما مدحت محروس فقال "أول يوم رمضان ده بنبقى عازمين كل أعمامى وعماتى، والديك الرومى لازم يبقى موجود فى نص السفرة، ومعاه المحاشى والرقاق باللحمة المفرومة والملوخية، ولازم الحلو يبقى قطايف بالمكسرات وقطايف سادة والعرقسوس والكركديه"، وقالت إيمان إبراهيم "طبعاً أول يوم رمضان بيبقى بتاع التجمعات كلها، وماما لازم تعمل الديك الرومى والفراخ المشوية عشان اللى مش بياكل الرومى، وبيبقى معاه رز بالخلطة ومكرونة بالبشاميل وجلاش باللحمة المفرومة".

الحمام

وبعيداً عن البط والديك الرومى أكدت ألاء فهيم أن أول يوم رمضان له طقوس خاصة عندهم وقالت "احنا مش بنحب البط وكمان مش بنحب الديك الرومى أوى، عشان كدة ماما بتعملنا حمام ومكرونة بالبشاميل ورقاق باللحمة المفرومة"، أما ندى صبحى فقالت "الحمام ومحشى ورق العنب والبتنجان دول أساسى فى أول يوم رمضان ومعاهم الملوخية والكشك عشان السفرة تكمل، والحلو بسبوسة بالقشطة وقطايف وطبعا الخشاف".

موضوعات متعلقة:

طريقة عمل الكريب الحادق بشاورما الفراخ.. بالصور والخطوات

بالصور..3 أكلات سريعة التحضير من البيض .. "ينفعوا عشاء"