لسّه الحنين موجود
رغم الآلام والجرح
لسّه الغرام بيجود
عز الهموم بالفرح
لسّه ف عنيكى ورود
واقفة تصلى الصبح
لسّه ف جبينك نور
يشبه شعاع الشمس
وأنا قلبى ناى مكسور
يهمس بحُبك همس
لسّه يابنت الحور
ممكن أدوب م اللمس
وامّا الحروف تترص
فيكى .. يطول الشرح
لسّه الحنين موجود
رغم الألام والجرح
رغم البعاد مشتاق
حُضنك يدفّى القلب
وشفايفك الترياق
تملا الكاسات وتصُب
دا أجمل الأشياء
يا حبيبتى كاس حُب
أسكر وافوق واسكر
واطلب كمان وكمان
يجرى الهوى سُكّر
مع دمّى ف الشريان
ونسيمك العنبر
يفتح ف قلبى ببان
قلبى يقول إعلان
حُبك .. بداية الفتح
لسّه الحنين موجود
رغم الآلام والجرح
زيدى الهوى زيدى
واروينى من شهدك
يا أحلى تنهيدي
قلبى صبح عبدك
والدم ف وريدى
بيضخ من عندك
لو غيبتى روحى تغيب
م انا روحى هيمانة
والضحكة تبقى نحيب
والدمعة حيرانة
عمر الجراح ما تطيب
وعيونى سهرانة
تبقى اللى غلطانة
واطلب كمان الصفح
لسّه الحنين موجود
رغم الآلام والجرح
لسّه يا بنت الحور
ممكن أدوب م اللمس
وامّا الحروف تترص
فيكى .. يطول الشرح
ورقة وقلم
