بص هى تلخبط بس نمشى معاها واحدة واحدة.
عارف أنت الحكاية بتاعت لو عاوز تستخبى استخبى جوه القسم؟!.. مشهورة.. صح؟!.. ده كان زمان، خد الأعلى بقى، لو عاوز تسرق عربية خش اسرقها من جوه قسم مكافحة سرقة السيارات، عاوز الأعلى؟!.. خد، اسرق العربية المسروقة من جوه قسم مكافحة سرقة السيارات واعمل ظابط كمان.
التخصص حلو، عشان كده «ولاء» متخصص فى سرقة السيارات، مركز ومذاكر وفاهم هو بيعمل إيه، بس لكل جواد كبوة، وكبوة ولاء وقعته على وشه، لما الشيطان ركبه، وغروره صور له إنه بطل العالم فى السرقة، وإنه أذكى من الجميع.
ولاء لقى إن رجالة المباحث مسكوا فى الشارع عربية هيونداى إلنترا كان سارقها، والعربية اترفعت من الشارع واتحرزت فى القسم، فعمل ظابط وراح مكتب مكافحة سرقات السيارات، ودخل دخلة حكمدار والطبنجة فى جنبه وطلع لهم الكارنيه، وقالهم العربية دى بتاعتى.
طبعا الكارنيه طلع «مزور»، والظابط المضروب طلع اسمه الحقيقى «ولاء» عنده 40 سنة، عنده قضيتين «نصب»، و3 أحكام حبس «سرقة سيارات» بإجمالى 5 سنين وشهرين، يا جبروتك يا أخى.
ما تسألش عن ولاء دلوقتى.. كان فيه وخلص.
