بالفيديو والصور.. تفاصيل سقوط خاطفة طفلة بعد 96 ساعة هروب بالعجوزة.. والدة الطفلة لــ"اليوم السابع": صعبت عليا لما حكت ظروفها وفوجئت إنها خطفت بنتى عشان تتسول بيها.. عمة المختطفة: رقم تليفون حل اللغز

الجمعة، 03 فبراير 2017 05:35 م

الطفلة رودينا

كتب بهجت أبو ضيف

اضف تعليقاً واقرأ تعليقات القراء

بعد 4 أيام من تعرضها للاختطاف، عادت الطفلة "رودينا" البالغة من العمر سنة ونصف، إلى أحضان والدتها، نتيجة جهد بذله ضباط وأفراد قسم شرطة العجوزة خلال تلك الفترة، منذ الإبلاغ عن اختطاف الطفلة حتى التوصل لهوية المتهمة وإعداد عدة أكمنة للقبض عليها.

"اليوم السابع" رصد تفاصيل الحادث منذ بدايته وتحدث مع "حنان" والدة الطفلة التى روت كيفية اختطاف المتهمة لابنتها فقالت " كنت موجودة بكافيه بشارع أحمد عرابى بالمهندسين منتظرة بنت قريبتى، وفوجئت ببنت عمرها حوالى 20 سنة بتبكى، صعبت عليا وسألتها مالك، قالت لى إنها بتنام فى الشارع بعد ما حماتها طردتها من البيت ومش معاها فلوس، وحكت لى عن حياتها والصعوبات اللى فيها، لحد ما قريبتى وصلت، والمتهمة قالت لى أنا هاجيب حاجة لرودينا من كشك البقالة عشان بتعيط، وخدتها وخرجت من الكافيه، وبعد 5 دقايق حسيت بقلق، خرجت أبحث عنها ملقتهاش، سألت الناس عن أوصاف المتهمة، قالوا أنهم شافوها معاها طفلة صغيرة وبتركب ميكروباص الجيزة .

وأضافت والدة الطفلة "اتصلت على قريبتى "منار" عمة الطفلة اللى كانت قابلتنى فى الكافيه وبلغتها اللى حصل، وتوجهت لقسم شرطة العجوزة وبلغت باللى حصل، مكنتش أعرف عن المتهمة أى معلومات عن اسمها الحقيقى ومكان إقامتها، ومكنش عندى أمل إن بنتى ترجع لحضنى تانى، ولمدة 4 أيام كان ضباط مباحث العجوزة بيبحثو عن المتهمة، لحد ما وصلوا للمتهمة وقبضوا عليها وكان معاها الطفلة، والمتهمة سرقت منها الحلق اللى كانت لابساه، وبنتى رجعت لى لكن كانت متبهدلة وحالتها صعبة، لأن المتهمة كانت بتتنقل من مكان للتانى، وبتتسول بيها.

وتحدثت "منار حسان" عمة الطفلة التى كان لها دور فى التوصل لهوية المتهمة فقالت "لما قابلت والدة رودينا فى الكافيه فوجئت إن فى بنت شكلها غريب قاعدة معاها، وسألتها مين البنت دى، قالت أنها اتعرفت عليها فى الكافيه، وإن ظروفها صعبة، وبعد شوية قبل ما أسيبها، طلبت من المتهمة رقم تليفونها عشان أكلم عليه والدة الطفلة لإن تليفونها فاصل شحن".

ولما والدة الطفلة عرفتنى إن رودينا اتخطفت، سلمت رقم تليفون المتهمة لضباط المباحث، وتتبعوا تليفونها وقدروا يحددوا مكانها وألقوا القبض عليها وعثروا معاها على الطفلة".

وأضافت عمة الطفلة "ضباط مباحث قسم شرطة العجوزة تعبوا معانا لحد ما قدروا يوصلوا للمتهمة ويقبضوا عليها، خاصة إن المتهمة مش ساكنة فى مكان معين، وكانت بتتنقل كل شوية من منطقة للتانية".

أحداث الجريمة كشف عنها بلاغ تلقاه العميد عبد الحميد أبو موسى مفتش مباحث شمال الجيزة من ربة منزل تفيد قيام فتاة بخطف ابنتها "رودينا محمد" البالغة من العمر عام ونصف بالعجوزة.

وكشفت تحريات رجال المباحث أن المتهمة اختطفت الطفلة من "كافيه" بشارع أحمد عرابى بالمهندسين، للتسول بها، ونجح رجال المباحث فى التوصل لمقر إقامة أسرتها، إلا أن والدها ذكر أنها تركت المنزل منذ عام ونصف، وأنه لا يعلم أى معلومات تحدد مكان تواجدها .

ونجح المقدم فوزى عامر، رئيس مباحث العجوزة، والنقيبان عمرو نصير وماجد غراب من تتبع الهاتف المحمول الخاص بالمتهمة، وتحديد مكان تواجدها، وبإعداد كمين لها تم القبض عليها وبصحبتها الطفلة، وبمواجهتها اعترفت بخطف الطفلة لاستخدامها فى التسول، فحرر محضر بالواقعة وأخطر اللواء هشام العراقى مدير أمن الجيزة واللواء خالد شلبى مدير الإدارة العامة للمباحث وأمرت النيابة بحبس المتهمة على ذمة التحقيق.