كلنا نذكر الطالبة مريم التى وصمتها الدولة المصرية بكاملها منذ سنتين بطالبة الصفر، ونهشت وزارة التربية والتعليم لحمها واتهمتها بالفشل وبالمرض النفسى حتى تدارى على خيبتها القوية.. مريم عادت الثانوية العامة ونجحت بمجموع خيالى ودخلت صيدلة وجابت امتياز.. مين بقى اللى فاشل ومريض يا مصر.. هه؟ مين؟!
* حالة المرور فى مصر تسير من سيئ إلى أسوأ، المشوار أبو ربع ساعة تاخده فى ساعتين وتلاتة، ولا نافع جوجل مابس، ولا جى بى إس، ولا أى تكنولوجيا، وشرطة المرور على حطة إيدك.. الشرطة المدرسية مفيدة عنهم، هل الحل فى استيراد شرطة مرور من الخارج؟ ولا خلاص هى متقفلة زى الدومنة يا مصر؟!
* دور زبالة بصراحة تلعبه سلاسل السوبر ماركت الكبيرة فى مصر فى رفع الأسعار بالاتفاق مع الشركات والمستثمرين لرفع أسعار السلع الغذائية بدون مبرر، الدنيا غليت، والدولار طلع ف السما وثبت، والأسعار استقرت عند أعلى مستوياتها، ليه يترفع تانى السلعة اللى تمنها ٥٠ جنيه إمبارح، ويقولك إنها بقت بـ٦٩ وعليها خصم ٩ جنيه، فهبيعهالك بـ٦٠.. وبعد كده السعر يرفع فى الأسواق وعند البقالين.. سرقة دى ولا مش سرقة يا مصر؟ بذمتك يا شيخة؟ ومعندناش ليه رقابة ع السرقة؟ كفرة إحنا يا مصر؟!
عدد الردود 0
بواسطة:
كمال العربى
شكرا أ محمد صلاح ...المحرر الفطن
أسلول جهنمى لرفع الأسعار مجانب سوبرماركات ال 7 نجوم تعرف عليه أ صلاح ..مباحث التموين عليها مواجهة مافيا هذه الشركات وإحباط خططها الإحتياليه التى تتوارى خلف أسمائها وما هى سوى نصبايا كبيره لا ملاذ لنا سوى المجمعات الإستهلاكيه مع زيادة منافذها وكياناته الإستهلاكيه للقضاء على هذا التوحش المفرط فى الجشع