هو الدولار نزل خالص، ولا بيشتغلنا وهيطلع تانى؟! طب الدهب اللى نزل مع الدولار، إيه اللى خلاه رفع تانى بالشكل المبالغ فيه ده؟! طب اللى عاوز يشترى دولارات يجيب من البنك ولا البنك مش هيرضى يبيع له؟! ولا يشترى من السوق السودا ولا ما يصحش؟!
طب طارق عامر لما قال الدولار هينزل كان بيتكلم جد ولا كانت نكتة زى ما رجع وقال؟! طب ومراته لسه فرحانة بالتعويم ولا زعلت؟!
طب التجار اللى رفعوا أسعارهم بحجة الدولار، ناويين ينزلوها تانى، ولا هى الأسعار طلعت ومبتعرفش تنزل؟!
والتجار بتوع «الشعب يأمر» اللى طلعوا فى التليفزيون وعملوا إعلانات مجانية مقابل إنهم هينزلوا أسعارهم وما نزلوهاش، فى حد هيحاسبهم ولا الشعب مكبر دماغه؟
طب السلع التموينية بتاعت الغلابة اللى غليت وزادت الفقر بتاع الناس فقرين، فى كلام إن حد يرجع يبص فيها؟
والقرض بتاع صندوق النقد الدولى، هينعش الاقتصاد ولا هيفقرنا أكتر؟ هيطحننا ولا هيزق معانا؟ والفلوس دى بتروح فين؟
يا ريت أى حد عنده إجابة يتصل بالأرقام الموجودة على الشاشة.. وهيكسب جنيه من بتاع زمان.
