ألف ألف مبروك، دخلنا المستقبل من البوابة الرئيسية، ووإحنا فى 2017، وزارة الداخلية، استحدثت نظام «الشباك الواحد» يعنى حضرتك لما تروح تقضى مصلحتك فى الأحوال المدنية، بدل ما تتنطط عند أستاذ محسن، ومدام اعتدال، وبعد ما يطلعوا عينك طلبات وحوارات، تنزل عند الأستاذ حسب النبى فى الأرشيف، وتطلع منه ع الأستاذ ياسر يقولك فوت علينا بكرة، فتفوت بكرة، وتقعد 5 ساعات فى الطابور، وفى الآخر تروح الخزنة تلاقيها قفلت.
دلوقتى حضرتك مواطن محظوظ، والشرطة اللى فى خدمة الشعب قررت تريحك وعملت خدمة استخراج بطاقات الرقم القومى والشهادات المميكنة «ميلاد – وفاة – زواج – طلاق»، من خلال الشباك الواحد، زغرطى يا أم نبيل من فضلك.
الخبر بتاع الشباك الواحد منتشر فى كل المواقع الإخبارية، ومفروض نفرح بيه، باعتباره تقدمًا وراحة وكده، مع إنك من سنين كان ممكن فى دولة عربية اسمها الإمارات تستخرج أوراقك كلها من ماكينة شبه ماكينة الصراف الآلى بتاعت البنك، بس مش مهم، أهو نص العمى حلو برضه، ألف مبروك ع الشباك الجديد، وعقبال البلكونة.
عدد الردود 0
بواسطة:
شاعر الياسمين
الايجابيات والسلبيات
فيه ايه يا صديقى .دى تطورات ناجحة .والتقليد ليس عيبا طالما للافضل .يعنى الخطوة الناجحة بتاعة محافظة القاهرة بتاعة بيع زبالتك ناجحة جداجدا .نتمنى تعميمها فى كل المحافظات .انا جاى من مديرية التعليم بالعريش .هناك ايضا خطوة ناجحة يجبان نشيد بها لتطوير دورات المياة ..والسرعة فى تخليص الاجراءات يجب ان نشيد بها ..الصح صح ..متعرفش عروستين اوزى شباب كده ..
عدد الردود 0
بواسطة:
عايدة
لو عملوا ..مصر كلها ... شباك واحد
كذا شباك و كذا بهدلة و الزحام لا ينقطع ...... مش عارفة لو عملوا شباك واحد هيبقي الزحام قد اية ... سوف يصل الي عنان السماء ... بس لازام تسلم علي مدام اعتدال و تشربها شاي .... و استاذ مش عارفة مين تصبح علية... يا استاذ صلاح انا علشان اجدد البطاقة زهت ... فقررت ان اعيش بدون بطاقة ...
عدد الردود 0
بواسطة:
عمر
يا استاذ صلاح العزب
المشاوير و البهدلة اصبحت اسلوب حياة و الموظفين يملؤن المكاتب بلا لزمة حتي الشباك الواحد لا يخلو من الرشوة.
عدد الردود 0
بواسطة:
ارحمتا يارب
المقال كاملا بالعامية !!
اعلى
عدد الردود 0
بواسطة:
ســـــــــــــــــــــامو الغضوب أحيانا
بالمناسبة // أنا أول مرة أعرف أن هناك كارت ذهبى للخبز بيد صاحب المخبز
صحيح أيه حكاية المقالات العامية الـ 100 % وفيها معلومات مستخبية ، الشباك الواحد ليس هو القضية .. الكروت الذكية ومهما بلغ ذكائها وعبقريتها يتم نهبها بجميع أنواعها (من الجميع وبلا أستثناء) أنتظروا كارت البنزين وكارت المحطة بالذات وشوفوا العجب ، وآدى أحنا قلنا .. بس خلاص مثلما يقول شعبولا المدهش !