عاوزكم تقرأوا الكلام ده كويس أوى وتفهموه أوى أوى، وتحاولو تنشروه علشان أى حد مغيب يفوق ويصحى، ويحمد ربنا على النعمة اللى إحنا فيها.. وكل اللى إلى عاوزه بس شوية ضمير عند كل واحد فينا.
اليورو = 20 جنيه.. الدولار = 18 جنيه.. الريال = 4 جنيه.. الجنيه = كام؟.. تعال كمل معايا.
الجنيه = 134.50 دينار عراقى.. فاكر العراق ؟ بقايا دولة بعد الانقسام الطائفى والاحتلال الأجنبى بعد انهيار السلطة.. الجنيه = 24.50 ليرة سورى، سوريا وما أدراك ما سوريا؟ لا تعليق.. الجنيه = 170.50 ليرة لبنانية، لم يسلم له دينه أيضا وإنما قهر أغلبَهم المد الشيعى وما هذا إلا بسبب نزاعات فئوية ودعاوى فوضوية.. الجنيه = 27.50 ريال يمنى، اليمن، صراعات حزبية ومطامع سياسية ترجح كفة الحوثى هناك.. هل تفهم الآن إلى أين سيذهب الجنيه؟ وما هو مصيره طالما أنك ما زلت تدعو إلى الفوضى؟
دعوتك إلى أن تتكرر فى بلدك مثل هذه السيناريوهات المؤلمة سيذهب بالجنيه إلى أبعد وأشنع وأصعب من ذلك.. البلد اللى فيها 20 رغيف عيش بجنيه وبتصرف للمواطنين زيت وسكر وجبنه فيتا ببطاقه التموين ببلاش، و36 محطه مترو بـ2 بجنيه، عمر ما يكون فيها ثورة جياع: غريبة يا مصر فى قدراتك.
الكلام ده للناس العقلاء فقط.. عندنا أزمة كبيرة فى العملة؟ = أيوة عندنا.. عندنا مشاكل اقتصادية حادة؟ = أيوة عندنا؟.. عندنا مشاكل مزمنة فى التعليم والصحة؟ = يوووووه، بالهبل.. عندنا أزمة فساد فى الذمم والنفوس؟ = طبعا عندنا، إلا من رحم ربى.. عندنا غلاء فى الأسعار والتجار جشعة وبتتلاعب بقوت الناس؟ = حدث ولا حرج.
طب ممكن أسأل كام سؤال تانى؟.. ولادك بيروحوا النادى كل يوم؟ أيوة.. صيفت السنة دى؟ أيوة.. بتنزل تسهر للفجر مع صحابك عادى؟ أيوه.. طب عندك لا قدر الله جيش منقسم ومنشق؟ لأ والحمد لله.. جزء من بلادك محتل؟ الحمد لله برضو لأ.. عندك قواعد عسكرية بتنتهك سيادتك على أرضك؟ الحمد لله رب العالمين، مفيش.. سبت بيتك ووطنك وقاعد فى مخيم على حدود أى بلد مستنى طيارة ترمى لك رغيف؟ الحمد لله محصلش.
حد من معارفك اتدبح والدواعش لعبوا الكورة براسه قدام الكاميرا؟ اللهم احفظنا.. لأ محصلش.. ولادك مدارسهم وجامعاتهم اتعطلت والسنة الدراسية اتلغت؟ لأ.. عندك فتنة طائفية بتحصد كل يوم مئات من دول ودول.. لله الحمد والشكر لأ.. عندك أزمة كهربا فى صيف خانق الحرارة فيه وصلت لأرقام قياسية؟ لأ.. الشتا اللى فات كنت نايم فى خيمه والتلج نازل حواليك لمده شهر؟ لأ.. بتنام من غير عشا؟ الحمد لله مستورة.
يبقى الخلاصة: أيوة بلدك بتعانى، وبتمر بظروف صعبة، ودى مش أول ولا آخر مرة فى تاريخ الدول، لكنها بفضل الله متماسكة كهيكل عام للدولة وغير منهارة يعنى بالبلدى مش أشلاء دولة، زى كل البلاد اللى اتقطعت واتدمرت ومش هتقوم لها قومة تانى طبقا لمخطط متحضر من سنين للمنطقة، وده كافى بإذن الله إنها تقوم وتتعافى إن أخلصنا النية لله وإوعى تنسى أبدا إن ربنا دايما فى المعادلة مهما أعيتنا السبل.. أنا لسه بحب البلد.. بنحبك يا مصر.. أدعوا لمصر.
• •
لا أعرف من كتب هذا الكلام الجميل، الذى حقق انتشارا واسعا على مواقع التواصل الاجتماعى، دون أن يكون ممهورا بتوقيع كاتب معين، إنه يستحق الشكر والثناء لحبه لبلده وفهمه العميق لما يمر به من أحداث، وما يتعرض له من ضغوط.. و.. ادعوا لمصر.
عدد الردود 0
بواسطة:
شاعر الفقراء
العدل والفساد الادارى
صديقى العزيز صباح الخير فيه ناس كتير جدا بتحب مصر كل بطريقته احنا محسوبين على المعارضة بنحبها جدا والناس المؤيدين بيحبوها برضة لكن الحب وحده لا يكفى والاغانى وحدها لا تكفى هى والشعارات او الاعلانات زى اعلانات الفنانين الاخيرة عن مرضى السرطان وهمه قادرين لو كل واحد فيهم اتبرع بارنب واحد يخلوا المستشفى عالمى على كل الاحوال الاقتصاد يبنى بالتخطيط والادارة الصحيحة لسنوات عديدة والاعتماد على فكر اقتصادى ومشروعات صغيرة وتصدير منتجات ..وقبل كل ده الاستفادة بجميع طاقات الشباب الموجودة وتشغيلهم سواء بقطاع خاص او عام اما الفساد الادارى فحدث ولا حرج مستشرى جدا جدا جدا ..واذكر بصفتى موظف تعليمى قبل ان اكون اعلامى ان التعليم ..الكنترولات بها فساد رهيب فى كل مراحل التعليم ثانوية عامة تعليم فنى وتعليم اساسى ويجب الغاء الكنترولات فورا او تخفيضها جدا مع تخفيض الورقة الامتحانية ..الغاء الامتحانات بالنقل بالتعليم الفنى .والغاء امتحانات الدبلومات ايضاوالتعويض عنها باختبارات عملية ونظرية داخل المدرسة وجعل شهادة الدبلوم منتهية والكليات باختبارات قدرات الغاء كل من القرائية والحسابية بالتعليم ايضا الغاء ما يعرف باسم الجودة اللى بقت فرصة لهواة التصوير والمنظرة ..عاوزين جودة فى الاخلاق اولا واحترام الطالب للمدرس وانشاء فصول جديدة الغاء المواد الثقافية بالتعليم الفنى وجعل التعليم الفنى عملى ورش فقط ومواد نظرية داخل الورش ..بما سيوفر عجز كبير جدا فى المعلمين ..ودى مطالب ابعثها للسيد الوزير يا رب ينظر اليها وان شاء الله اكتبها فى مقالت قريبا جدا ....ولى مطلب بسيط جدا اتمنى ان يتم رفع الظلم والتحدى عنى من التعليم فى سيناء وترقيتى فى مكانة اعلامية مناسبة من السيد المحافظ او السيد وزير التعليم بالعمل فى ديوان الوزارة خاصة ان المديرية والادارة بالعريش ضدى على طول الخط ..واخيرا اتمنى ان يحفظ الله مصر ونرى الجنيه المصرى يعود الى مكانته ايام ما كان اسمه الجنيه الجبس واخيرا اتمنى ان اتجوز واحدة شبه يسرا اللوزى لهطة القشطة قول امين
عدد الردود 0
بواسطة:
الشعب الاصيل
اللي بيحب مصر
اللي يحب مصر يشتغل بإخلاص وضمير ويكفينا شره
عدد الردود 0
بواسطة:
فرتيجو
الحلوة القشطة sh
فيه ناس كل وظيفتهم يدافعوا عن المفسدين واى حد ييجى ناحيتهم ومنافقين بيقولوا عكس اللى يعملوه عاوزين فتح كل ملفات الفساد
عدد الردود 0
بواسطة:
احمد صلاح
يا مصر قومى وشدى الحيل
يا مصر قومى وشدى الحيل كل اللى تتمنيه عندى
عدد الردود 0
بواسطة:
Mostafa
السلام عليكم
والله كلام مضبوط فعلا وصحيح ١٠٠*١٠٠ بس مش عارف الناس بقت بتعارض فى اى حاجة لية وانابعترف ان فى صعوبات وفضايح كمان فى الاسعار والاقتصاد وكلو بس فعلا بالنسبة لغيرنا وخصوصا الفترة دى فعلا احنا حلويين والله الحمدلله.امبارح مثلا السيسى نزل كام قرار بخصوص التموين وكدة على حد علمى تنحاز للمواطن.بردو طالعين بيعارضو