عاملة ضفاير وبتلعب الأوله
خطوة من بعدها خطوة منقولة
ضحكة بريئة بتضحك الدنيا
أصل الحياة عندها يسر وسهولة
رايحة على المدرسة معاها صاحبتها
نقشت على التراب رجليها خطوتها
تسمع غناها يدب فيك الأمل.....
ساعة شروق الشمس يا محلى طلتها
راجعة من المدرسة حاضنة البنية كتاب
بإيديها الصغيرين خبطت ع الباب....
أبوها قال أهى وصلت عروستنا......
وزغرطت أمها وهى على الأعتاب
على كنبة متهالكة شيخ عجوز بعقال
لمح البنية قال ما شا الله عال العال
مبروك عليك البنية يا طويل العمر
المهر تبغاه مصرى والا تبغاه ريال
بعد سنة بالتمام رجعت عروستنا
عينيها فيها كلام يشهد بقسوتنا
وهم السعادة راح وحلت تعاستنا
وإحنا اللى كنا سبب موت طفولتنا
جواز ده يا عالم والا دى تجارة
اللى فاكرينه مكسب آخرته خسارة
لو حياتك صعبة بكرة تتعدل.....
لكن بناتك أمانة والدنيا غدارة....
