كلمينى
كلمينى عن عيونك
انتى عارفة
إن لما الدنيا تقسى كنت أدوب ف عنيكى أدفى
وإن كل الناس ف كفة
والحياة جنبك ف كفة
وإنى مهما بعدت عنك
برجع أندم ع المجازفة وارجع ابعتلك دموعى
تعتذر مكسورة آسفة
انتى عارفة
كلمينى يمكن اصحى الصبح زى ما كنت عندك
تعمليلى الشاى ف كفك
وتدوقيه قبل أما ادوقه يمكن السكر قليل
وابقى عامل نفسى نايم بس بستهبل وشايفك
خايفة يبقى مر يعنى؟
كل حاجة مرة بعدك
كل حاجة يا حبيبتى ناقصة ريحتك ناقصة طعمك
عارفة بصحى الصبح بدرى
اتصال فى طلق نارى
أنزل أجرى
ألقى كل الناس بتجرى
تدخل الإسعاف تنوح
قلبى بيكسر ف صدرى
عودونى يا حبيبتى الفطار لازم ف سينا
يبقى جنبه دم مصرى
كل بيت ف الأرض دى علق شريطة سودا مره
الفواخرى والصقلى
الرميلى والسواركى
وال جاى من وجه قبلى
المعارض والمؤيد
أرض شاربة الدم بدرى من زمان الموت أسرها
والسلاح سلطان وسيد
مرة جتلى ف ليلة جثة
ألف واحد وصلوها
لموا ف الفستان ضلوعها
وغسلوها بدمع أبوها
مال عليا أبوها قالى
بنتى من ليلتين قالتلى هلبس إيه لما اجى اعيد
توهت بين عجزى وخيبتى
دم بنته ع الجوانتى
قولتله ف بلادنا قسموا
فرحة الأعياد ونسيوا
يقسموا للشيخ زويد
طب أقولك عن خديجة؟ ولا سلمى؟ ولا سالم؟ ولا حلمي؟ ولا زينب؟ ولا عزمى؟
وال أيدى كات ف صدره
وال أيدى كات ف بطنه
وال م الصدمة نسيته
كام مسيحى مات ف بيته
كلمينى ياحبيبتى
كلمينى متسكتيش
كلمينى فكرينى أن لسه الدم غالى
وإن من أحياها أجره عند رب الناس يعيش
كلمينى واوصفيلى ألف كلمه عن عيونك
كلمينى يمكن أنسى انى جراح ف العريش ...
