13 نصيحة لاستخدام التاكسى الموتوسيكل.. لو خايف على برستيجك ماتركبش

دخل مؤخرا التاكسى الموتسيكل ضمن وسائل النقل المصريين، وذلك على مستوى العاصمة القاهرة والإسكندرية، ذلك من خلال قيام عدد من الشباب بعمل مشروع خاص بهم يتيح للمواطنين استقلال الموتسيكل بدلا من السيارات. ووسائل النقل المختلفة، ورغم عدم حداثة الأمر حيث أنه موجود فى عدد من القرى النائية، ويعد وسيلة المواصلات الوحيدة فى بعضها، لكن الجديد فى الأمر هو ظهوره فى القاهرة والاسكندرية، ومن المتوقع ان تشهد الأيام القادمة توسعا ودخول "التاكسى الموتسيكل"ضمن أسطول النقل المختلفة بمصر.

 مؤخرا أعلنت إحدى شركات النقل الخاصة، عن إتاحة خدمة "سكوتر" أى التاكسى الموتوسيكل لعملائها، وتوافرها عن طريق "أبلكيشن" خاص بها، وبعد تجربة الأمر لابد من بعض الإرشادات والنصائح.

وبعيدا عن الرسميات هناك عدد من الإرشادات اللى ناوى يركب التاكسى الموتوسيكل ياخد باله منها

1. لازم يكون عندك ثقة فى نفسك وأنت بتركب عشان لو قلقت هتقع.

2.متركبش موتسيكل لو أنت رايح الشغل أو مشوار ..اركب وأنت راجع بيتكم عشان هتحتاج تاخد شاور "تستحمى".

3.ياريت يكون فيه نظارة عشان عينك كل شوية هتدمع او يدخل فيها تراب ..وعلى فكرة متفتحش بؤقك وأنت راكبه.

4.أصحاب أمراض المستقيم ميركبهوش، مش محتاج أوضح.

5.لو خايف على برستيجك متركبش هتتبهدل.

6.متحاولش تبص على الناس وأنت راكب لأنهم هيشكوا إنك عايز تسرقهم.

7.ممكن تلاقى السواق بيقول كده ألفاظ مينفعش تتقال متركزش معاه عشان توصل بالسلامة.

8.لازم تلزق لامؤاخذة فى السواق هيقولك قرب عليا يا بيه تقوم أنت تقرب ومتتكسفش ..هيقولك احضنى برده متتكسفش واحضنه هو عارف شغله.

9.سائقو الموتسيكلات عندهم لازمة كده بيعملوها براسهم بيرمى طرف عينه يشوف فيه حاجة جاية وراه ولا لأ ..متقلقش ومتركزش عشان لو ركزت هتفضل تعمل زيه واحتمال تكمل معاك حتى بعد ماتنزل.

10.لما تنزل تحاول توقف ومتمشيش على طول وتحول للنظام العام عشان وانت راكب هتبقي على النظام الهزاز..طبيعى هتلاقى رجلك منملة وبتتهز لوحدك.

11. لو وزنك زيادة عن 100 كيلو متتطلبهوش أساسا لأن ساعات السواقين وزنهم بيعدى 100 وده حرام على الموتسيكل.

12.وأنت راكب لازم يكون معاك اثبات شخصية عشان ممكن حد يوقفك تحرى.

13.لازم يكون عندك لياقة بدنية عالية عشان ممكن لو الطريق زحمة هتنزل تشيل معاه الموتسيكل وتعدوا الطريق.