مش كل صمت معناه إن الكلام خلص، ولا كل سكوت معناه ضعف، و لا كل سكون معناه وَحدة، الصمت فى أحيان كتيرة يحمل الكثير من الإجابات.
ساعات العين بتتكلم وتعبر أكتر من الكلام، العين مرآة القلب، أحلى كلمات الحب بتتقال بالعيون، لغة العيون هى أوضح لغة ومش محتاجة لترجمة ولا كلام، بتقول أكتر بكتير من الحروف، لو راسم على وشك أكبر ابتسامة بس أنت حزين عينك هاتفقد بريقها وتبقى مطفية، ولو بتحب عينك هايكون فيها لمعة مش ممكن تستخبى.
فيه صمت مريح بيعبر عن قرب اتنين لبعض، فاهمين بعض من غير ما يتكلموا، من نظرة العين ممكن يفهموا الطرف التأنى محتاج إيه أو حاسس إيه، سعيد ولا حزين، قلقان ولا مطمئن، فيه ترمومتر دقيق بيحس بكل تغيير، طبعاً نوع العلاقة دى مش كل حد بيوصلها، بتيجى مع الحب و العشرة والتركيز فى التفاصيل الصغيرة قبل الكبيرة، الناس دى بتشوف وتحس بقلبها.
فيه صمت بييجى لما يكون خلص الكلام، كل الكلام اتقال بدل المرة مية بس اللى أنت بتكلمه مش عايز يفهم، اسكوت بييجى معاه إحباط. بتتعب من المناهدة وتفقد الأمل، بتتعب وطاقتك بتخلص فى محاولاتك لتوصيل مشاعرك واللى جواك، صمتك هو أحسن إجابة لناس لا تحترم كلامك.،مع الوقت تبدى تتأقلم على الوضع اللى مش عاجبك وتحاول بصمتك تداوى جروحك، ده الصمت اللى صوته أعلى من أى صرخة.
فى أحيان كتيرة الصمت بيبقى أفضل من الكلام مع ناس ماتستاهلش وقتك وطاقتك، ما تستاهلكش أنت شخصياً، مش كل حد تزعل منه يستاهل إنك تعاتبه، اختار الناس اللى تتكلم معاهم، ماتضيعش وقتك على ناس عمرها ما حاتفهمك، ده مش معناه الاستسلام، ده معناه إنك اخترت نفسك واشتريت وقتك.
ساعات فى حياتنا بنحتاج للسكون علشان نسمع نفسنا، الدوشة اللى حولينا والصخب خلونا ما نسمعش الصوت اللى جوانا، نرجع خطوة ورا، علشان نتأمل حياتنا، لازم من وقت للتأنى نبعد شوية ونشوف قلبنا بيقولنا إيه، صوتك الداخلى هو حقيقتك وهو أكتر صوت المفروض تثق فيه، حدسك بيبقى صح فى معظم الأحيان، حل إنسان محتاج وقت يعد فيه مع نفسه علشان سلامته وصحته النفسية.
وفيه نوع من الصمت لما يظهر فى أى علاقة بيبقى مؤشر لبداية النهاية، الحوار والمناقشة وساعات كمان الخناق أساسى فى أى علاقة ناجحة. النقاش مفتوح فى كل حاجة، لو مافيش صراحة ووضوح يبقى ده أكبر دليل على إن العلاقة دى غير صحية، لو كل طرف قفل على نفسه وبدأيعيش مع نفسه مع الوقت العلاقة لازم تنتهى، حايبقوا اتنين أغراب عايشين تخت سقف واحد، الصمت فى الحالات دى، بيبقى إعلان عن موت هذه العلاقة.
فى النهاية أحب أقول إن فيه مواقف كتيرة اختيارك لعدم الكلام، بيبقى أفضل كتير من كلام يوقعك فى الغلط أو يتفهم بمعنى غير اللى تقصده، المهم تعرف إمتى تتكلم وإمتى تختار السكوت.
