صور.. مصرى شغوف بشراء السيارات القديمة يقتنى 100 سيارة عتيقة

منذ 55 عاما مضت، بدأ سيد سيما (70 عاما) يجمع السيارات القديمة ويشتريها بأسعار زهيدة تقديرا منه لجمالها ونُدرتها، وبعد أكثر من نصف قرن أصبح سيما يملك الآن أكثر من 100 سيارة قديمة يعود تاريخ صنع أقدمها إلى 120 عاما، وهى أوبورن موديل عام 1900 واشتراها فى ثمانينيات القرن الماضي.

وقال سيما، وهو جالس فى السيارة العتيقة ذات الهيكل المصنوع من الخشب المغطى بالصاج، "دى عربية نادرة، وعربية طبعا أنتيكة، وبص العربية كلها خشب مكسية بالصاج، يعنى بص هنا القوائم، القوائم هنا كلها خشب مكسية كلها بالصاج، التابلوه ده خشب، الطفاية بتاعتها، عربية نادرة، الدركسيون (المقود) برضه خشب، حاجة محصلتش دي، الدركسيون يبقى خشب دى حاجة نادرة طبعا. العداد هنا بيلف بكرة ويقولك 10، 20، 30، بيلف بكرة مش مؤشر كده لأ، بكرة بتلف".

وأضاف "شوف العربية الموتور بتاعها الأصلي، ده ملهاش طلمبة (مضخة) بنزين، تعتبر ده، ده الخزان بتاعها نظام شفط، بيشفط عن طريق الفرن بيشفط بيعبى ده، ده ضغط... عربية بقالها 120 سنة الموتور بتاعها الأصلى موجود فيها، عربية تحفة، حتى ده خشب، صدر العربية خشب".

وما زال سيما مفتونا بالطريقة التى تعمل بها السيارات القديمة، من محركاتها وعداداتها إلى سرعتها والطريقة التى تعمل بها مكابحها.

وقال عن سيارة عتيقة يتفقدها أمام الكاميرا "آدى القزاز (الزجاج) أهوة بيتطبق وبينزل، وآدى السقف أهه برضه يعتبر كابورلية، حاجات طبعا إيه، يعتبر نادرة، عربية شيك جدا وفاخرة، منظر جمالي، بتحس وأنت ماشى بالعربية الكل بيتفرج عليك ويشوف جمال العربية".

ويشارك سيما شغفه الغريب ابنه أيمن (38 عاما)، حيث نشأ على مشاهدة الأفلام التى ظهرت فيها ذات السيارات التى يملكها والده حاليا.

وقال أيمن لتلفزيون رويترز "بص حضرتك أنا اتولدت لقيت نفسى عايش جوه العربيات القديمة، لقيت والدى شغال فى الحاجات دي، فبدأت إن أنا أحب أشكال العربيات القديمة. بدأت أُعجب بشكلها وبحلاوتها وبجمالها. ثانى حاجة حببتنى فيها إن أنا لقيت العربيات دى بأشوفها قدامى فى الشاشة، وأنا صغير كنا إيه بأشوف إيه الممثل الفلانى ده راكب العربية بتاعتنا".

وعن سيارة عتيقة قادها أيمن وتحرك بها داخل المعرض قال "العربية دى طبعا غير العربيات العادية، دى عربية دركسيون يمين، يعنى السواقة عكس ... العربية دى كانت سرعتها قليلة غير العربيات الحديثة. الفرامل بتاعتها نظام نظام تياش حديد كده بتيجى فى الطنبورة بتقفل فبتهدي، يعنى أنت عشان تقف لازم تضرب فرامل قبل ما تقف بحوالى أربعة، خمسة متر".

ويحتفظ سيما وابنه أيمن بالسيارات فى صالة بمدينة الإنتاج الإعلامى فى مصر، حيث يستأجر المخرجون تلك التحف لتظهر فى برامج وأفلام خاصة بحقبة تاريخية معينة.

وقال سيما إن من بين الشخصيات الشهيرة، التى يملك حاليا سيارات كانت مخصصة لها، الرئيس المصرى الراحل أنور السادات، الذى لديه حاليا سيارته الرئاسية الشيفورليه إمبالا سوداء اللون موديل عام 1975.

السيارات العتيقة

السيارات القديمة فى معرض سيد سيما (1)

السيارات القديمة فى معرض سيد سيما (2)

السيارات القديمة فى معرض سيد سيما (3)

السيارات القديمة

سيد سيما فى احد السيارات القديمة

سيد سيما فى احد السيارات