قال الفنان أحمد السقا، إن زملائى يعتبروننى صاحب كعب أخضر عليهم يعنى بيبقى وشى حلو على أى حد يشتغل معايا.
وأضاف خلال لقائه مع الإعلامية ناردين فرج ببرنامج التاسعة على القناة الأولى المصرية: أصعب فيلم عملته في حياتى كان فيلم إبراهيم الأبيض ولو عرض عليا في الوقت الحالى مش هعرف أعمله، كان صعب جدا وأنا أحب هذا الفيلم جدا وبعتبره فيلما ملحميا وكان شغله صعب جدا، كان كله شقى وتعب وكان فيه أسماء عملاقة، كل حاجة كانت صعبة التمثيل وصعب والشخصية والأكشن والتصوير والإخراج، كنا مجموعة ممثلين كبيرة على رأسنا الراحل الكبير محمود عبد العزيز.
وتابع: أصعب مشهد هو مشهد الحريق أنا اتحرقت فعلا وأشعلوا فيا النار، لكن كل حاجة بتبقى مدروسة في ناس فاكراها جرافك هي مدروسة مش فتونة وهى تكنك أنا ممكن أقول جزء منها لأنها سر الصنعة، فى مادة كده بنحطها تحت الملابس وبتنزل درجة حرارة الجسم إلى 4 تحت الصفر، فى خلال 7 دقائق لازم أكون أمام الكاميرة والمتوسط 17 ثانية وأنا قعدت 23 ثانية وجاتلى هيستريا وما فوقتش وفقدت الوعى بعد ما خبطنى بطفاية الحريق، والحمد لله ربنا بيستر.
