عمرو أديب يطالب بالاحتفال بعيد الأم بعيدا عن الأمهات: هتزعلوا لو رحوا منكم

طالب الإعلامي عمرو أديب، خلال برنامج الحكاية، الذى يذاع على قناة "mbc مصر"، المواطنين بعدم الذهاب إلى أمهاتهم والاحتفال بعيد الأم معها، وعبر قائلا: "معلش استحمل الفترة دى شوية، وأكيد الأمهات مش هتزعل منكو، صدقونى هتزعلوا أكتر لما تفقدوهم، و70% من المرضى في المستشفيات فى كل بلاد العالم تحت 50 سنة، وبيستحملوا، إنما الناس الكبيرة لا يمكن تستحمل، هل حد فينا هيفرح لما يعذب أبوه أو أمه؟ اهتمامكوا بيهم اليومين دول فعلا لما متروحلهاش تحتفل معاها بعيد الأم، معلش استحملوا السنة دي".

واستكمل الإعلامي عمرو أديب حديثه: "زمان كنت بقولكوا مش عاوزين نبقى سوريا والعراق، دلوقتي بقولكوا مش عاوزين نبقى زي أسبانيا وإيطاليا وألمانيا، الشرطة بتاعتنا بتتحايل على الناس عشان تطلع بيوتها، لكن الناس بتستخبي منهم جوة المحلات ويقفلوا على نفسهم، ومش دي مهمة الشرطة أساسا، المفروض أن كل واحد فيها خايف وقلقان، الناس جايبة الجبروت ده منين، أنتوا بتفكروا إزاي، أنت مش بتأذي نفسك أنت بتأذي اللى حواليك".

وأضاف الإعلامي عمرو أديب: "المُدخنين بيتعبوا أوي لما بتجيلهم الإصابة، خدوا بالكوا أرجوكوا هتتعبوا جدا لو حد فيكو اتصاب، مش لازم حد مننا حد قريبه أو حبيبه يقع عشان يقدر حجم وخطورة الموضوع، الناس ماشية في الشارع بتسأل على كورونا، ده مش سلوك ناس عاوزة تعيش، أنا بطلب من كل واحد أنه يحافظ على حياته، ورغم كل ده، بقول أن في ناس عندها وعي كبير وفي محلات عندها وعي أكبر مما كنت أتخيل".