رد إيهاب جلال المدير الفنى للمقاصة على حقيقة فشل لاعبى المقاصة أثناء تواجدهم فى صفوف قطبى الكرة المصرية الأهلى والزمالك، موضحا: "ليس حقيقى هناك حسين الشحات يلعب أساسى مع الأهلي، وكان هناك أفشة وحمدى فتحى كان معنا فى إنبي، وبالنسبة لأحمد الشيخ الأهلى معرفش يلعب أحمد الشيخ مش حاجة تانية، والأهلى جايب 70 لاعبا فى الخط الأمامي، والشيخ راح فى أول سنتين ينزل 10 دقائق يجيب جون ورجع تانى بقى هداف الدورى وفى نفس الدورى اللى بيلعب فيه الأهلي، أنت مش عارف تلعبه مش مشكلتي، وأحمد سامى انتقل لبيراميدز ويسير بشكل طيب.
تابع فى تصريحات خاصة لـ"اليوم السابع": "أحمد الشيخ عاوز يتعامل كويس ويفهم بيعمل إيه وكنت أتعامل معه نفسيا وهو لاعب كبير ولم يكن محتاج اثبات نفسه والأهلى لديه عدد لاعبين كتير وكان بياخد الدورى وهو وحش حتى، لان الفرق كلها اقل منه، وتلعب الشيخ أو متلعبوش مفيش حد بيضغط لكن لو مخدتش الدورى أو ماشى وحش الجميع كان هيجبرك انك تلعب الشيخ، هو ستايله شوية جايز الناس مش عارفة تتقبله".
أردف: "بالنسبة لحسنى فتحى وعماد فتحى ونانا بوكو كانوا يسيرون بشكل جيد ويسجلون أهداف، ولكن رحيلهم عماد وبوكو بسبب "حرب وكلاء" والأندية يكون لديها وكلاء معينين قريبين من الإدارات تتدخل فى ذلك، وهم لاعبين كبارا وبوكو كان هدف الدورى قبل قدومه للزمالك، وهم لعبوا لفترات صغيرة وظلموا لانهم لم يحصلوا على فرصتهم الكافية، كما أنهم انتقلوا فى أوقات صعبة وبدون فترة اعداد بخلاف تغيير المدربين، ونحن لم نجبر الأهلى أو الزمالك على التعاقد مع لاعب معين هم من يختاروا.
