تخرج من منزلها يوميا حاملة على ظهرها شنط كثيرة بها كافة أنواع الأطعمة البيتى الشهية، أم منة أشطر سيدة فى دهب بتبيع الأكل البيتى للأجانب، تسعى يوميا لتربية بناتها الأربعة.
وتقول ام منة، إن الأجانب والمصريين وكل الناس بتيجى تاكل عندى هنا وبعمل محشى بكل أنواعه وفراخ بانيه ومكرونة بالبشاميل والأجانب بتحب تيجى تاكل عندى هنا يوميا .
واستكملت، "أنا معايا دبلوم صناعى وبتكلم إنجليزى على قد البيع يعنى أبيع بالإنجليزي للأجانب واتعلمت من وقفتى أتعامل معاهم إزاى، وفى أجانب برضه هنا بتعمل أكل وبتقف تبيعه، وأنا سر من أسرار أكلى ونفسه هو المكرونة البشاميل محدش كل منها ومقلش عليها تحفة".
وأردفت، الناس بتقول عليا أقوى ست فى دهب علشان مفيش حاجة بتهزمنى لأنى قوية بإيمانى وعارفة إن ربنا هيبعتلى رزقى لأنى بصلى الفجر فى معاده، وأنا فخورة بشغلى اللى بشتغله انا واقفة بقوة وكل الناس بتحترمنى".
وأوضحت، بناتى سر سعادتي وأنا بعمل ده علشان بسعى على تربيتهم وجوزى بيعشق الاكل من ايدى، وإن شاء الله بطمح انى افتح سلسلة محلات أم منة لانى بقالى هنا 20 سنة شغالة فى دهب.
